اسكريبت فتاة احلامي بقلم ايمان شلبي
في مكان ظلمه بتطلبي مساعدتي كل ما بجري نحيتك في الحلم بتختفي فجأة،الحلم اتكرر معايا لمدة اربع شهور نفس الحلم ونفس النهاية!
مكنتش قادر افهم ليه انا بالذات اللي بتطلبي مساعدتي لحد ما قررت ادور عليكي مكنتش عارف ياتري أنتِ موجودة في الحقيقة ولا لا؟
ولو موجودة هلاقيكي فين وازاي وهظهر في حياتك بصفتي مين من الأساس جبت رسامين محترفين يرسموا ملامحك اللي حفرتها في ذهني بعدها خليت ناس اعرفها تدور عنك في كل مكان حتي لو في اخر الدنيا المهم اعرف أنتِ مين وايه حكايتك.
ردت بصوت واهن وضعيف
ولاقيتني فين؟!
هز أكتافه ورد بأبتسامة
تخيلي بعد ما قلبت عليكي الدنيا شوفتك صُدفة!
فين؟!
في المستشفي كنت بزور واحد صاحبي وشوفت الممرضين بينقلوكي في الأوضة اللي جنبه.
ردت والدموع بتلمع في عيونها
ه هو فين جوزي
اخد نفس عميق ورد بغموض
قصدك طليقك!
ضمت حواجبها في بعض وهي بترد بأنفاس متقطعة
ط ط طليقي؟!
يوم ما شوفتك سألت عنك قالولي انك بقالك شهر مرمية في المستشفي ومحدش بيسأل عنك عرفت ان جوزك هو اللي جابك ورماكي في المستشفي بعد معاناه وصلتله ومن غير ما اعرف اسباب طلبت منه يطلقك مقابل مبلغ من المال مكانش كبير اوي ومش قيمتك لكن هو في الحقيقة مأخدش غلوة ووافق علي طلاقك وعدم التعرض ليكي ولا كأنه يعرفك.
هزت راسها بنفي وحطت ايديها فوق بوقها وهي بتشهق من العياط والصدمة والوجع اللي جواها
مكانتش قادرة تصدق أن ياسين حب عمرها يعمل فيها كدة،يبيعها بالرخيص وكأنها سلعة ملهاش قيمة!
راودها مليون سؤال في الثانيه الواحدة
ازاي هانت اوي بالشكل ده؟
ازاي مراية حُبها كانت عامياها عن حاجات كتير ؟
ازاي في يوم كانت شايفه في ياسين الشخص المثالي اللي مفيش منه؟!
طب هي عملت ايه علشان يأذيها
هي كل اللي عملته
انها حبت
انها قدمت تنازلات كتير
وأنها تغاضت عن أخطاء
وأنها غفرت لأفعال
وأنها قدمت قلبها علي طبق من دهب لشخص ميستاهلش
فكان لازم يبقي ده جزاء أحسانها وثقتها ومُبرراتها لأفعاله اللي بتأذيها سواء نفسياً أو جسدياً.
احياناً بسبب عطائك المفرط مع
ملك!
خرجت من شرودها علي صوته
رفعت عيونها وسكتت لحظة
مسح دموعها برقة وهو بيهمس قدام وشها
متزعليش اوعدك اني هعوضك عن كل يوم صعب شوفتيه في حياتك.
ردت بنبرة مبحوحة
انت عايز مني ايه؟
عايز اساعدك!
ابتسمت وردت بتهكم
بس انا مطلبتش مساعدتك شكراً لأفضالك ولو سمحت اتفضل من هنا انا مش سلعة علشان تبيعوا وتشتروا فيها و.....
هتروحي فين بعد ما تخرجي من المستشفي لو انا مشيت وسيبتك؟!
سألها فجأه وهو بيربع ايده وبيرفع حاجبه الشمال.
سكتت لحظة وبصت قدامها بشرود
مكانتش عندها اجابة علي سؤاله
هي للاسف ملهاش حد غير خالتها وياسين جوزها اللي بيكرهها،اللي ما صدق يتخلص منها،اللي طلعت مخدوعة فيه!
اتنهد وهو بيحط كفه فوق كفها فخرجت من شرودها ورفعت عيونها اللي كلها دموع ،خوف،وحيرة
همس برقه ونبرة كلها دفا
تعالي معايا ومتخافيش صدقيني مش هأذيكي
ردت بنبرة كلها خوف
وانا اضمن منين انك مش هتأذيني!
سكتت لحظة بعدها كملت برعشة في صوتها
اذا كان ابن خالتي وحب عمري كان عايز يخلص مني علشان شويه ملاليم
بس انا مش هو!
ردت بسخرية ومرارة
وانا اعرفك منين عشان اصدقك؟!
هز أكتافه ورد بهدوء
عايزة تعرفي عني ايه وانا هجاوبك
مش يمكن تكذب؟؟
هز رأسه بتأكييد
ممكن
سكتت لحظه بعدها اتنهدت وبصتله وقالت
انت عايز مني ايه؟!
رد بهدوء
مش عايز منك حاجه انا عايز اساعدك!
وانا برفض مساعدتك
رد بسخرية
هتروحي فين بعد ما تخرجي من هنا هترجعي لأبن خالتك يخلص عليكي المرة دي بجد؟!
ردت بعصبية ودموع
ميخصكش واتفضل اطلع برا
قام وقف وهو بيقفل الجاكيت بتاعه وبيرد بهدوء وتفاهم
انا هسيبك ترتاحي شويه وتهدي اعصابك بس اللي عايز اوصلهولك اني مش هسيبك أبداً لاني ما صدقت لاقيتك حتي لو أنتِ رافضه وجودي مسيرك تتقبليه
قال جملته الأخيرة ببرود وإصرار غريب، وبعدها خرج من المكان بخطوات ثابتة كأنه كان واثق من كل كلمة قالها.
أما ملك فضلت تبص لمكانه متقدرش تنكر أبدًا إنها حست براحة غريبة وملهاش وصف في وجوده،
رغم خوفها، كانت حاسة بأمان غريب كأنها عارفة إنه مش هيأذيها.
ورغم حيرتها، كانت موافقة من جواها تروح معاه، حتى لو كان آخر الطريق ظلام أو حتى الجحيم.
جواها مشاعر متناقضة بتصارع بعض في نفس اللحظة
خوف وأمان
حيرة ورضا، كانت ما بين الرفض والقبول.
شك ويقين
مش عارفة هو مين لكن متأكدة إنه قدَرها اللي مكتوب!
كانت بتتنفس بعمق وكأنها بتحاول تلحق أنفاسها قبل ما تاخد قرارها الأخير، قرار ممكن يغير كل حاجة في حياتها
ها بقيتي احسن؟!
قالها وهو بيقتحم الأوضة مرة تانية
ابتسمت لا إرادياً وهي بتسأل بذهول
معقولة هبقي احسن في خلال خمس دقايق؟!
هز أكتافه ورد بهدوء
مش كفاية؟
هزت راسها بنفي وهي بتبص قدامها وبتتنهد
مش كفاية
قرب منها وسحب كُرسي وقعد عليه
سكت لحظة بعدها قال بنبرة كلها حزن
انا اسف
حركت رأسها نحيتة وهي بتسأل بأستغراب
بتتأسف علي ايه؟
علي كل احساس بشع حسيتي بيه وعلي كل لحظه صعبه عدت عليكي وأنتِ لوحدك
انت بتعمل معايا كده ليه ياغيث؟
رد ببساطة
عشان بحبك
بس انت متعرفش عني حاجه أنا مجرد واحده ظهرت في احلامك
ظهورك كان كفيل يخلي قلبي يتعلق بيكي ويحبك أنتِ عارفه انا كنت كل يوم بحب انام علشان اشوفك
كان نفسي اعرف عنك اي حاجه
نفسي اعرف اي معلومه توصلني ليكي
لكن للأسف مفيش اي مشهد كان بيتكرر قدامي غير صورتك وانتي متقيده وبتبصيلي علشان انجدك
ردت والدموع بتلمع في عيونها
هو ياسين مسألش عني ابداً؟!
رد بغيظ
ياسين باعك افهمي بقي باااااعك
غمضت عيونها بقوة وحطت ايديها فوق ودنها وهي بتتنفس بسرعة
اما عن غيث اتنهد وشال ايديها من فوق ودنها بكل هدوء وهو بيقول بنبرة كلها حنان
تعالي معايا يا ملك مش هأذيكي
ردت وهي بتفتح عيونها ببطئ
خايفة اصدقك
اتنهد تنهيدة طويلة بعدها سألها بهدوء
تتجوزيني؟
ردت بذهول
نعم اتجوزك!!
كان لسه هيرد لكن الباب اتفتح مرة واحده ودخل شخص قال بصوت غليظ وخشن
انت مين ياولدي؟
لف رأسه لمصدر الصوت بأستغراب اما عن ملك جالها حالة ذهول وصدمة خلت أطرافها تتجمد اول ما عيونها جت علي
غيث وهو بيرد بثبات
حضرتك اللي مين ؟
بص نحية ملك اللي ارتجفت وهي بتهمس بخوف
ج جدو
قرب الشخص من غيث وهو بيبصله من فوق لتحت بتعمق وفضول لحد ما وقف قدامه مباشرة وقال بهدوء وسخرية
ياتري أنت بقي اللي ضحك عليها بكلمتين وخلاها ترمي نفسها من الشباك وتعمل التمثيليه دي عشان جوزها يطلقها؟
رد غيث بأستغراب
افندم ايه الكلام اللي حضرتك بتقوله ده
قرب من ملك فجأة وسحبها من شعرها وهو بيجز علي أسنانه وبيقول بصوت خشن وغليظ
بقي أنتِ يطلع منك كل ده،تبعتي عشيقك يهدد جوزك اما يطلقك او يموت امه ويقهر قلبه عليها!
هزت راسها بدموع وخوف
لا لا ياجدو والله العظيم لا محصلش ا انا انا.....
غيث بعصبية وغضب وهو بيبعده عنها
ده بقي الكلام اللي قالهولك الحقير وانت صدقته؟!
رد بسخرية وهو بيشاور نحيته بعكازه
اومال عايزني اصدق نكرة زيك إياك!
ضغط فوق أسنانه وهو بيتنهد وبيحاول يسيطر علي أعصابه المسلوبة ورد بهدوء
انا مش هرد عليك عشان حضرتك راجل كبير بس اللي حصل غير كدة تماماً،اللي حصل أن ياسين بيه كان عايز يضرب ملك وهي وقفت فوق الكنبة وفجأة وسط الكلام داخت ووقعت وهو جابها رماها هنا في المستشفي كان بيدفع الفلوس وراميها ولا حتي بيسأل عنها ولا هو ولا أمه وانا ا احم انا دكتور هنا كنت كل ما اجي اشوفها مش بلاقي حد بيزورها سألت عن أهلها قالولي جوزها جابها هنا ومن وقتها مبيجيش صعبت عليا وحبيت اساعدها روحت الاستقبال عرفت رقم جوزها وكلمته طلبت أقابله قالي أنه بيكرهها وبيتمني يخلص منها وأنها حِمل عليه صعبت عليا اكتر وطلبت منه يطلقها طالما هو بيكرهها اوي بالشكل ده ،رد عليا وقالي لا أطلقها عشان تتجوز واحد تاني ويلهف ورثها واطلع انا من المولد بلا حمص ،سألته كام ورثها قالي ٥٠ الف قولتله انا هدفعهوملك وطلقها وهو ما صدق وطلقها، هي دي كل الحكايه حضرتك وبعدين حضرتك جاي دلوقتي بعد سنة تسأل عنها!!!
رد بغيظ
انا لو عليا مطايجش اشوف وشها انا جاي اغسل عاري بيدي
حتي بعد اللي حكتهولك؟؟
وانا اضمن منين انك بتجول الحجيجةالحقيقة
ردت ملك بدموع
هي دي
رد بقسوة
اعملي حسابك هتيجي تعيشي معانا
