سيطرت مشاعر بقلم زهرة الربيع
الشركه كلها
طه قال بتوتر....معنى كده انو كان بيعرف بكل شغلك في المكتب
سليم ابتسم بسخريه وقال..خليه يلف على الفاضي...اصلا من اول ما حط رجلو في الشركه وانا عارفه ملوش امان وممكن يرشي اي حد فيها...علشان كده اي حاجه مهمه بتممها في البيت...بس للاحتياط خد الكاميرا دي فرغها باي طريقه... وشوف لو فيها حاجه مهمه واعرف حاططهالي هنا من امتى
طه هز راسو بالموافقه وقال....تحت امرك
ولسه هيخرج سليم وقفو وقال....استنى... وانا جاي على الطريق قلت لي انك عايزني وفيه حاجه مهمه ....في ايه كمان اتحفني
طه بلع ريقه بتوتر وقال.... بلاش النهارده يا باشا ..كفايه اللي انت فيه ... اقول لك يوم تاني
سليم بص له بطريقه رعبته وقال....طه...اخلص في ايه
طه قال بتوتر شديد...هو احم.... هو حضرتك قبل كده كنت قلت لي اعرف لك مين اللي ساعد مشاعر هانم وكتب ابن حضرتك
سليم قال بسرعه ولهفه....و لقيته صح... حد من معارفنا مش كده
طه بلع ريقه بتوتر وقال.... طبعا حضرتك مهو عشان يكتب ابنك لازم يكون يعرفكم
سليم زعق فيه بغضب وقال..... ما تتكلم يا طه ....هو انا ناقصك النهارده
طه قال بسرعه وخوف..... ادهم بيه....... ادهم بيه هو اللي كتب الباشا الصغير ....وهو اللي كان بيساعدها
سليم اتسعت عينيه بذهول شديد ومسكو من هدومه بلا وعي وقال بعنف....انت بتقول ايه...ها بتقول ايه يا غبي انت.... ادهم اخويا انا .....ادهم كان عارف مكان مشاعر وووووو
ادهم مين اخويا..... اخويا كان عارف مكان مراتي ومخبيها عني انت بتهزر صح لا ده انت بتستعبط... اكيد في حاجه غلط
طه نزل راسه بحزن عليه وقال..... انا اتاكدت بنفسي ياباشا....قابلت الناس اللي كانت الهانم ساكنه عندهم واكدولي ان محدش اتواصل معاها غير اخو جوزها ..وانا مصدقتش بردو وورتهم صورة ادهم بيه وقالو انو هو .... وكمان اتاكدت من الوحده الصحيه اللي اتكتب فيها الولد
سليم كان هيقع من طوله مش مصدق ابدا الللي بيسمعه .... اخر حد جه في باله انه يكون ادهم الللي ساعدها....وانه كان عارف مكانها كل الوقت ده وشايفه بيدور عليها وساكت
سحب مفاتيح عربيته وقال لطه بتحذير..... انا هساله...و لو طلع مش هو هتتنفخ يا طه
قال كده ومشي بغضب وذهول وطه بص لطيفه بحزن شديد وقال....ياريت كنت انا الغلطان...ربنا يكون في عونك
عند ادهم كان مصدوم جدا من كلام ميرا وقال بذهول ...نعم ياختي.... يعني ايه عايزه تشوفيني.... جايباني على ملا وشي وكنت هعمل حادث بسببك عشان تقولي لي عايزه تشوفيني ....طب والشرطه اللي بره دول اقول لهم ايه ....معلش الهانم كانت عايزه تشوفني
ميرا نزلت عيونها في الارض بحرج وقالت..... ما انا ما كنتش اعرف انك هتعمل كده يا ادهم... ما تخيلتش انك هتجيب البوليس
ادهم قال بدهشه..... امال اتخيلتي ايه.... هالبسلك سوبر مان واجي لك طيران ...ايه الاستهتار والعبث اللي انتي فيه ده
ميرا لسه هترد بس البوليس خبط جامد والضابط من بره بيقول...اكسرلي الباب ده ياابني
ادهم غمض عنيه بغضب وراح فتح بتوتر وحرج
الضابط قال برسميه .....دي شقه ميرا الالفي ...جالنا بلاغ ان في لص هنا
بقلم...زهرة الربيع
ادهم قال بتوتر.... ايوه يا فندم فعلا...وانا اللي قدمت البلاغ.... اسف جدا جدا على الازعاج انا فهمت غلط كل حاجه تمام هنا زي ما انت شايف
الضابط بص لميرا وقال بشك...متأكدين
ميرا قالت بسرعه....طبعا حضرتك لو فيه حاجه كنت قولتلك اكيد
الضابط قال بضيق....طيب... حصل خير بعد كده اتأكدو كويس قبل الاتصال بالقوه
الضابط قال كده ومشي وادهم بصلها بغضب ولسه هيمشي مسكت ايده وقالت بسرعه....ادهم... ارجوك استنى انا اسفه ارجوك تسمعني
ادهم زق ايدها وقال بغضب.... اسمع ايه... انتي مش شايفه احرجتينا ازاي .... كويس اصلا اللي ما عملولكش محضر ازعاج
ميرا لسه هتتكلم ادهم قاطعها وقال بسرعه ....ميرا قلتها لك وهقولها لك تاني ...انسيني خالص... لو كان في اي امل للرجوع بيننا ما كنتش طلقتك من اساسه ....وكفايه قلة قيمه بقى خلي عندك شويه كرامه
قال كده ومشي وميرا بصت لطيفه بذهول بسبب كلامه ..اول مره يقولها كده حست بغضب وغيظ وقفلت الباب بعصبيه وبقت تكسر كل حاجه حواليها
اما ادهم نزل وهو مضايق جدا بسبب اللي حصل وكمان مكانش حابب يكلمها كده بس كان قاصد يقسى بكلامه علشان تبعد عنه
اتنهد وهو بيحاول يقنع نفسه ان ده افضل وراح لعربيته اللي ركنها على الجهه التانيه من الشارع بس وقف شويه لما جاله اتصال من سليم رد وقال....نعم... يا سليم
سليم قال بغضب..... انت فين يا ادهم
ادهم قال باستغراب من صوته ......كنت رايح الموقع... بس مخنوق شويه وهرجع على البيت .....في حاجه ولا ايه
سليم قال بغضب..... عايزك ضروري ..متتأخرش
قال كده وقفل وادهم بص للتليفون بقلق بسبب صوته ولسه هيتحرك لكن فاجاو كلاكس عربيه كانت قريبه منو جدا و رجع لورا بفزع
العربيه وقفت في اخر لحظه بعد ما كانت هتخبطه و نزلت رحمه منها وبصت له بذهول وقالت..... انت ...انت كاسب عمرك في كيس شيبسي يا بني ادم انت ....كل ما قبلك الاقيك بتتكلم في التليفون في نص الشارع كده ....وفي الاخر لو حد خبطك تجيب له مصيبه
ادهم ابتسم لا اراديا وقال ....مش معقول رحمه.... قصدي انسه رحمه ....انتي بتعملي ايه هنا
رحمه قالت بخنقه ....جايه عند واحده صاحبتي اهو حظ زفت وخلاص
ادهم ابتسم وقال .....انا معرفش حظك عامل ازاي.... بس اللي اعرفه ان حظي من السما ...مبسوط اني رجعت شفتك
رحمه حاولت تصتنع البرود وقالت.... وانا مش مبسوطه خالص اني شفتك.... واه بالمناسبه... الورد بتاعك انا رميته في الزباله وبطل حركات المراهقين دي
لسه هتمشي قال بسرعه.....هو انا ممكن اعزمك على اي حاجه في اي مكان تختاريه..... ولا ده يعد تحر ش برده
رحمه كانت عايزه تبتسم بس التفتت له وقالت بضيق مصطنع ....ثقتك بنفسك مش طبيعيه..... ومش فاهمه على ايه
قالت كده ومشيت وهو ضحك بخفه وفضل متابعها بعيونه لحد ما دخلت نفس الكمباوند كان اللي ميرا ساكنه فيه... بس طبعا ما جاش في خياله ابدا انها هي دي صاحبتها اللي جايه تزورها لان المكان فيه سكان كتير
مشي و ركب عربيته وفتح التابلوه وكان معاه الكارت اللي لبنى اديته له اتصل بتليفونها الخاص واول ما ردت قال ....الو مدام لبنى .....انا ادهم النمس كنا اتقابلنا قبل كده في مشكله مع بنت حضرتك لو تفتكري
لبنى افتكرته فورا لانه بعت الورد قبلها قالت بسعاده ....اهلا وسهلا استاذ ادهم....و طبعا حابه اشكرك بالنيابه عن بنتي عن الورد الجميل اللي بعته...يعني هيه اكيد ما لحقتش شكرتك انت عارف انها لسه زعلانه شويه...بس عجبها واحتفظت بيه كمان
ادهم اتفاجأ وابتسم تلقائيا وقال...بجد..بجد احتفظت بيه
لبنى قالت بسعاده لانو مهتم ....اه والله ده عجبها جدا
ادهم اتحمس اكتر وقال...طيب ياهانم انا كنت بكلم حضرتك لاني حابب اقابلك ضروري..فيه موضوع عايز اتكلم معاكي فيه بس بعيد عن انسه رحمه لو ممكن
لبنى قالت ..اه طبعا ممكن جدا
ادهم ابتسم وقال....بعد ساعه يناسبك
لبنى قالت...يناسبني جدا....هبعتلك لوكيشن وهكون في انتظارك هناك
ادهم ابتسم بسعاده وقال..... شكرا جدا لذوق حضرتك
وقفل معاها وطلع بالعربيه بسرعه كان عايز يشوف سليم ويعرف ليه كان متضايق ويطلع فورا يقابلها
اما رحمه راحت لميرا وخبطت عليها ميرا فتحت وقالت بدموع... رحمه
وبقت تعيط
رحمه قالت باستغراب.... في ايه يا بنتي مالك.... اهدي يا حبيبتي في ايه ..و
بس اتفاجأت بمنظر الشقه كانت كل حاجه حواليها متكسره قالت....ياخبر ايه ده...مين اللي عمل كده
ميرا قالت بدموع ...طليقي...طليقي كان هنا ...وكننا بنتكلم وفجأه ضربني وكسرلي الشقه
رحمه اتسعت عنيها بزهول وبقت تبص للمكان بصدمه وخوف
في مكان تاني كان حازم والد غاده مستني حد في الكافيه وبعد شويه وصل وكان خالد وقال برود .....باشتنا... اتاخرت عليك
حازم قال بخنقه....يارب يجي بفايده....معاك جديد
خالد مد له ايديه اللي كانوا متربطين وقال بسخريه ....ادي الجديد كله ....خطيب بنتك حرق لي ايديا الاتنين
حازم ابتسم بسخريه وشرب شويه من قهوته وقال ....عملت له ايه
خالد قال ببرود ....ولا حاجه بيغير ... انت متاكد انك عايز تجوز بنتك لواحد زي سليم ....يعني طوب الارض شايف حبه لمراته الاولى ....مش حاسس ان ده هيتعس بنتك
حازم ابتسم بسخريه وقال..... ومين قال اني هسمح بكده ..مفيش حد على وش الدنيا يقدر يتعس بنتي ..امحيه من عليها
خالد بص له بقلق وقال..... انا بساعدك في كل حاجه وبجيب لك اخباره اول باول....لان بنا اتفاق ...و مش هسمح باي اذيه لمشاعر
حازم ضحك جامد وقال..... لا ما تقلقش..... اللي هعمله هيساعدك مش هيضرك .... مشاعر بابنها حلال عليك ولو اني ماعتقدش ان في بينكم اي فرصه.... ولا ناسي انك اخوها
خالد اتنهد بضيق من سخريته وقال.....الموضوع ده انا هعرف احله ....ريح دماغك من ناحيته .... المهم تنفذ وعدك وتخرجها من البيت الملعون ده
حازم قال بضيق...اكيد هعمل كده ..مش علشانك علشان غاده.... انا اخر همي انت ومشاعر بتاعتك.. كل اللي يهمني دلوقت سليم .....كنت حاطط كاميرا في مكتبو والظاهر كشفها ..عايز اعرف بيخطط لايه ....هدوءه معايا و تهاونوا بالطريقه دي مش مريحني كل ما بيكون هادي كده بقلق... انا عايزه يفضل تحت ايدي لو فلت مني مش هقدر اسيطر عليه تاني
خالد قال بضيق...انا مش عارف انت متمسك بيه ليه ..ما انت كمان غني وعندك شغلك
حازم قال بسخريه...ده كلام اللي زيك ميفهمهوش....سليم ده ثروه ابوه مش عارف قيمتها.... انا محتاجه معايا ومش هنبقى مصلحه واحده الا لو جوازته من غاده تمت
خالد قال بسخريه ....والله انا كل اللي اقدر اعمله اني ادي لك اخباره.... اديك شايف انا مش قادر اساعد نفسي... اصلا بقيت اخاف منه بقى مرعب ...وحاسس انها مش هتيجي على قد كده وبس
حازم قال....ما تخافش سليم بيحسبها كويس ومش هيقدر ياذيك مش حبا فيك....بس علشان الكارت اللي معاك ...حافظ عليه واعرف تستخدمه كويس هو ده اللي هتقدر تلوي بيه دراعه
بقلم...زهرة الربيع
عند ادهم اول ما رجع على البيت لقى مشاعر في الجنينه مع ابنها واخيرا كانت لوحدها قرب منها وقال.... ازيك يا مشاعر ...هو سليم رجع
مشاعر قالت بضيق.....اه رجع وطلع ياخد شور ..ومتعصب
ادهم قال بتوتر..... هو انت زعلانه مني
مشاعر ابتسمت بسخريه وقالت... انت عملت حاجه تزعل
ادهم اتنهد وقال .....انا فاهم انك زعلانه لاني محذرتكش ..وانو كان لازم اقولك ان سليم عرف مكانك ... بس يا مشاعر صدقيني كده احسن.... والله انت متعرفيش سليم اتعذب قد ايه في بعدك وكان بيدور عليك قد ايه ....انا كان قلبي بيتقطع عليه وانا شايفو هيموت و يلاقيك وانا عارف مكانك و مش قادره اقول له علشان امانتك اللي حملتهالي ...بس لما قدر يلاقيك بنفسه صعب عليا ابعدك عنه واقولك وتهربي منو تاني.... حقك عليا بس قلبي ما طاوعنيش اعملها..... كنت حابب تتقابلو وتتكلموا يمكن....
بس مشاعر قاطعته وقالت بغضب.... يمكن.... يمكن ايه يا ادهم ....هو انت مش شايف اخوك بيعمل ايه...ولا ما كنتش تعرف انه خاطب.... انا مش شايفه اي حاجه من اللي انت بتقولها ولا لندم ولا زعل عليا ولا اي حاجه ....عايش حياته طبيعي جدا ولا كاني كنت فيها.....انا كنت حاطه كل ثقتي فيك ومطمنه ان يوم ما هيعرف مكاني هتحذرني ....بس غلطت ما كانش لازم اوثق للدرجه دي..... في النهايه انت اخوه وانا زي ما قال بنت السواق .....اكيد هيصعب عليك اخوك انما اللي عامله فيا ما يصعبش عليك ابدا
ادهم نزل عيونه في الارض وقال... لو كان اللي بتقوليه ده صح ما كنتش سعادتك سنتين كاملين وخليت ابنه بعيد عنه كل الوقت ده... يا مشاعر انا كل اللي اقصده انه كفايه كده الهروب مش حل... وانا كنت دايما اقول لك الكلام ده وانت ما كنتيش تسمعي كلامي ...لازم تواجهيه لازم تتكلمي وتقولي له انت زعلانه من ايه.... انا عارفه انك مش هتصدقيني بس والله العظيم سليم بيحبك...... ولا غاده ولا 10 زيها يدخلوا قلبه انت في حته تانيه..... بس هو مجروح من اللي عملتيه ومعاه حق
مشاعر ضحكت بسخريه وقالت... معاه حق..فعلا
ادهم قال بسرعه....وهيفضل معاه حق لحد ما تتكلمي وتقولي ايه اللي مزعلك وايه اللي خلاكي تهربي من البيت....لو سمحتي متقسيش عليه اكتر من كده..والله سليم اتجرح جدا من اللي عملتيه و....
ولسه هيكمل بس قاطعو صوت سليم وهو بيقول بوجع ....بس مش قد اللي انت عملته
ادهم و مشاعر التفتوله بصدمه وذهول وووووووو
هو صحيح اللي هي عملته جرحني... بس مش قد اللي انت عملته...صعب اقوم من النوم الاقي مراتي هجرتني من غير اي سبب... بس الاصعب بقى لما اعرف ان اخويا شقي وتوامي اتفق معاها وكان عارف مكانها وشايفني بتحرق ومخبي...ولا انت شايف ايه يا ادهم باشا
ادهم اتصدم باكتر موقف كان خايف منو وبيتمنى ميجيش ومشاعر توترت قوي لما عرفت انه كشف كل حاجه
كانت لسه هتتكلم بس سبقها ادهم وقال بسرعه ودموع.... لو سمحت يا سليم ....وحياه اغلى حاجه عندك اديني فرصه اشرح لك.... ارجوك
سليم ضحك بسخريه وقال بدهشه.... تشرح لي.... تشرح لي ايه...قال يشرح لي قال
مشاعر قالت بسرعه .....يا سليم ادهم ملوش دعوه ...هو كان ...
بس سليم قاطعها لما ازعق فيها بشده وقال.... انتي ما تدخليش خالص ...اركنيلي على جنب وخليكي في خيبتك.... انا ساكتلك وما تصرفتش معاكي لحد دلوقت عشان مستني اجيب اخرك زي ما جبت اخره....ومسيري هفهم كل الموضوع من اوله وساعتها يا ويلك مني
مشاعر بلعت ريقها بتوتر من زعيقه وغضبه و هدى ونادر طلعوا على الصوت وكانوا مش فاهمين في ايه
بس وضحت الامور لما سليم بص لادهم وقال بسخريه ووجع... مبسوط و انت واقف قدامي بالشكل ده ....ازاي قدرت تعمل فيا كده....ده انا كنت فاكر اني ما ليش حد غيرك ....كنت شايفني بدور عليها ليل نهار وهتجنن و ما بنامش.... كنت شايف قلبي محروق وبعد الايام والليالي علشان معاد ولادة ابني و انت روحت بنفسك شلتو بين ايديك و كتبت له اسمه...بس فهمني ازاي قدرت تعمل كده... ازاي هنت عليك
ادهم نزل
راسو بحرج شديد ونزلت دموعه بندم وقال ...حقك عليا ...انا...انا عارف اني غلطت.... بس نيتي كانت اني اقربكم من بعض واجمعكم من تاني ....ما كانش قصدي اجرحك كده اقسم بالله ... صدقني يا سليم انا ما عنديش اغلى منك
سليم قال بتعب ونفاذ صبر..... بس بس خلاص ....حصل خير انسى سليم خالص .....انا اللي كنت شاكك فيه انت اكدتهولي... انا اللي ما ليش مكان في البيت ده مش مشاعر ....انا اللي كان لازم امشي ... في النهايه مستحيل كلكم وحشين وغلطانين ... اكيد العيب فيا انا ...اكيد انا متحبش علشان كده ببقى اهون حد عند الكل
قال كده ومشي وادهم جري وراه وهو بيقول بدموع .....سليم ارجوك ....لا يا سليم لا ارجوك... ارجوك اقف واسمعني ....اسمعني لو سمحت والله انا اسف.. اسف علشان خاطري يا سليم
بس سليم مشي بسرعه من غير ما يقف وهو بيقول بغضب شديد وزعيق..... ما تجيش ورايا.... مش عايز اسمع صوتك فاهم
قال كده ومشي وادهم وقف مكانه ودموعه بتنزل ... كان متاكد ان هيجي اليوم ده ...بس كان متخيل انه هيحكي له هو بنفسه ويشرح له وجهه نظره ويقنعه
هدى ومشاعر جريو على ادهم
وهدى قالت بدموع وصدمه...ايه ده...ايه اللي بيتقال ده انت بجد كنت عارف مكان مرات اخوك ....ليه يا ادهم تعمل فيه كده ليه
ادهم كان مدمر حرفيا بقوه وبقى يبكي وهي بقت تحاول تهديه ودموعها بتنزل بحسره على سليم وقلقانه عليه جدا
اما مشاعر نادت لابتسام واديتها الولد وقالت بسرعه وقلق...خلي بالك من نادر يا ابتسام ...اكليه ونيميه مش هتاخر باذن الله
قالت كده وطلعت جري ورا سليم و هدى بقت تنادي عليها بخوف بس ما وقفتش قالت بقلق شديد..... استر يا رب... استر
كل ده كان تحت انظار نادر اللي عقله متوقف تماما ومش في باله كل اللي سمعوا دماغه واقفه عند جمله واحده بس قالها سليم وقت غضبه .... اذا كان ابويا نسي اني ابنه واتخلي عني من طفولتي.... بيحاول يفهم معنى الجمله دي ومش قادر يستوعبها نهائيا
بقلم...زهرة الربيع
عند سليم ركب العربيه بمنتهى الغضب ولسه هيدورها مشاعر وقفت قدام العربيه وهي بتقول.....سليم انزل من العربيه ....انزل ما ينفعش تسوق وانت بالشكل ده
سليم بص لها بغضب شديد وقال..... ابعدي من قدامي عفاريت الدنيا بتتنطط في وشي السعادي ....وجاهز افرمك تحتها ومش هيهمني
مشاعر قالت بتوتر...لا مش هبعد.... انزل بقول لك مش هينفع تسوق وانت بالشكل ده بطل تهور
سليم قال بغضب وزعيق.... لاخر مره هقول لك ابعدي من وشي يا مشاعر
مشاعر قالت بغضب واصرار.... لا مش سامعه ... ومش هسمع انزل من العربيه .... مستحيل اسيبك تمشي بالحاله دي
سليم قال بدهشه ...وليه بقى ان شاء الله ....خايفه عليا ولا ايه... انتي مش كنتي عايزه تطلقي يا حلوه زعلانه ليه مش هتفرق لو اتطلقتي او اترملتي في الحالتين هتخلصي مني وترتاحي
مشاعر قالت بضيق منه..... سليم بطل قلة عقل
بقى وانزل..مفيش حاجه بتتحل بالشكل ده
سليم كان بيبصلها بغضب شديد وهي كانت متاكده انه مش هيسمع الكلام قالت ....يعني مش هتنزل...... طيب براحتك وفتحت باب العربيه وقعدت جنبه وقالت..... اتفضل سوق بقى خلينا نموت سوا ...كده كده ما حدش فينا مرتاح
سليم بصلها بدهشه وقال بغضب شديد.... انت عايزاني اخلص عليك النهارده ولا ايه .....انزلي من العربيه خليني اغور في داهيه مش طايق نفسي بقولك
مشاعر قالت بعند..... مش هنزل خلينا نروح في داهيه مع بعض
سليم اتغاظ جدا وقال بغضب شديد....انتي تؤمري
وساق بسرعه كبيره جنونيه وكل شويه يذود السرعه اكتر لما العربيه بقت شبه طايره من على الارض
مشاعر خافت جدا ومسكت في الباب وقالت..... هو..هو انت بجد ناوي نروح في داهيه دلوقت
سليم ما كانش بيرد عليها ومكمل بسرعه شديده مسكت فيه بخوف شديد وقالت...... طب ينفع تنزلني انا غيرت رايي ....يعني مش هينفع اروح معاك دلوقتي ....ايدي فاضيه ما يصحش
سليم رغم عصبيته وخنقته منها لكن كان شكلها وهيه خايفه مضحك جدا ابتسم بشر وفضل مكمل وهو مذود السرعه وبيدخل وسط العربيات و كذا مره هيعملوا حادث وطلع على طريق فاضي متعرج والعربيه بقت تتهز بيهم
مشاعر حطت ايديها على ودانها ووطت دماغها وهي بتقول.... يا لهوي يا لهوي يا لهوي انا اللي استاهل ...علشان يبقى المحن ينفعني يامصبتييي
سليم ابتسم بسخريه وقال.... ايه خفتي يا حلوه ولا ايه
مشاعر صرخت بخوف وقالت..... ما لكش دعوه خد بالك من الطريق... ياخرااابي
سليم كان خارج عن شعوره وبيفكر في كل االلي حصل وهيتجنن
ومشاعر حست بخوف شديد فعلا لما لقيته بيسوق بجنون و في شجره كبيره جدا قدامهم على بعد مسافه
قالت بذهول..... وقف العربيه هناخبط في الشجره يا سليم
بس هو مكمل بسرعه و مش شايف قدامه هنا قالت بدموع ورجاء .....سليم احنا معانا طفل..... ما حدش هيقدر يخلي باله عليه زينا .... لو مش عشاني وقف علشانه
بس سليم فضل مكمل وهي غطت عيونها باديها وبقت تنطق الشهاده بس قبل ما يوصلوا للشجره سليم وقف العربيه بسرعه وكانت دماغها هتتخبط على الكبوت بس اتفاجئت بايده بتحمي وشها واصطدمت ايده بالعربيه
مشاعر بصيت له بدموع وهي بتاخد نفسها بالعافيه من كتر الخوف وهو فتح باب العربيه ونزل و بقى يفك الكرفته بتاعته بخنقه شديده وبيحاول ياخد نفسه بصعوبه
مشاعر نزلت دموعها على حالته وهيه حاسه بذنب رهيب لانها السبب في الموقف ده ونزلت وراه وهيه مش عارفه تقول ايه
عند ميرا في الشقه كانت رحمه واقفه مصدومه من المنظر وقالت بخوف...ليه...ليه عمل كده
ميرا قعدت و قالت بدموع....معرفش يارحمه معرفش...انا تعبت انا مش عارفه بيعمل فيا كده ليه مع اني بعشقه ...مخنوقه اوي يا رحمه..انا لازم ارجع للدكتوره تاني حاسه اني مش كويسه ابدا.. لو سمحتي لما تيجي رايحه عندها قولي لي نروح سوا
رحمه قعدت جمبها بسرعه وقالت بدهشه... دكتورة ايه اللي تروحيلها...احنا نطلع على القسم فورا نثبت حاله ..ويشوفو الشقه ونعملو محضر الحيوان ده..ازاي يتجرأ عليكي كده
ميرا قالت بدموع...مقدرش اذيه يا رحمه انا بحبو
رحمه زعقت فيها وقالت بغضب..حب ايه وهباب ايه...لسه بتقولي بحبو...بتحبي واحد توكسيك مريض وحيوان
ميرا اتنهدت ومسحت دموعها وقالت بحزن.... ياريت قابل يرجعلي يا رحمه ...عدو تلت سنين على طلاقنا ...و كل يوم اصبر نفسي واقول انه مش هيقدر على بعدي واكيد هيشتاق لي بس ما فيش فايده ولا كاني كنت في حياته
رحمه اتنهدت وقالت بحزن..... انا قلت لك يا ميرا يا حبيبتي
ميرا ضحكت وقالت ...اه صحيح.... انت ما شفتيهوش قبل كده ولا مره
رحمه ابتسمت وقالت..... وهشوفه ازاي.. اذا كنا اتعرفنا انا وانتي بعد ما اتطلقتي منه
ميرا ابتسمت بسخريه وقالت...ايوه حسره على حظنا اتعرفنا عند دكتوره نفسيه
رحمه قالت بضحك.... عشان تعرفي الرجاله بتعمل فينا ايه ..وتصدقيني لما اقولك دول وباء
ميرا ضحكت جامد وقالت.....بس انا متأكده انك لو شوفتي ادهم هتغيري رايك في كل الرجاله.... ومش بعيد تعشقيه
رحمه ضحكت بسخريه وقالت..... اعشقه حته واحده ...ولا اي راجل في الدنيا دي ممكن يخليني اعشقه...وبعدين اسمه اصلا فصلني منه.... اصل الشاب اللي اخر مره اسمه ادهم...غايظني غيظ كل شويه الاقيه في وشي لا وكمان باعتلي ورد امبارح على البيت خلى منظري يكسف قدام ماما
ميرا حاولت متبينش غضبها وقالت..بجد....ده شكلو واقع....والله اعلم ممكن نسمع اخبار حلوه قريب
رحمه وقفت وقالت بغيظ.. انا غلطانه اللي جيت عندك اصلا ....يلا انا همشي ..و بالليل نبقى نروح نزور دكتوره منه ...عيزاها توقفلي العلاج لاني بقيت كويسه ومش محتاجاه
يلا اشوفك بعدين حبيبتي
وودعتها ومشيت وميرا قفلت الباب وراها بغضب وقعدت على الكنبه وصبت كاس كالعاده وبقت تشرب وهيه بتفتكر كلام لبنى لها في التليفون امبارح لما كلمتها علشان تقولها على موضوع الورد ..وكان كل شئ تمام لحد ما اتصدمت صدمة عمرها
كانت بتكلمها في التليفون وقالت...يا طنط والله فهمت انا قولتلك هظبطهالك متقلقيش..ومش هخليها تعرف انك كلمتيني
لبنى قالت بامتنان.... انا مش عارفه من غيرك كنت هعمل
ايه والله ربنا يخليكم لبعض ..والله يا ميرا معندكيش فكره انا عندي امل ازاي المرادي حاسه ان ربنا هيكرمها الشاب جدع وقمور ومن عيله ومهندس قد الدنيا
ميرا اتفاجأت وقالت بحماس.... ايه ده بجد... مهندس
لبنى قالت ..ايوه مهندس...هيه قالتلي اسمو كذا مره بس نسيت ...اسمو...اسمو حاجه النمس كده... مهو من عيلة النمس يمكن تسمعي عنها
ميرا اتسعت عنيها بشده وبقت مش عارفه تنطق ولبنى قالت بسرعه..ايوه ادهم...اسمو ادهم النمس
فاقت من شرودها لما الكبايه اللي في ايدها اتكسرت من ضغطها عليها وجرحت ايدها رمتها بعصبيه في الحيط وقالت بغضب.....لا يارحمه...مستحيل ...مش يوم ما تخفي تجننيني انا لا ...مش هيحصل
في بيت نادر النمس كان ادهم قاعد بتعب على الكرسي وحاطه ايديه على دماغه ومش عارف يعمل ايه
ونادر كان قاعد بضيق شديد و مش بيتكلم علشان حالته
ادهم بص له وقال بحزن...... انا عارف اني غلطت.... بس انا ..
ابوه قاطعه وقال بجمود.... لا انت ما غلطتش ....اللي عملته اكبر من الغلط بكتير ....عايز اعرف انت ازاي تعمل حاجه زي دي...فين كان عقلك.... ده انا كنت بتباهى بحسن تفكيرك ورزانتك... كنت شايف بعينك اخوك وهو هيموت ويعرف مراته فين وهيموت ويحضر ولادة ابنه ...شفتو كان متدمر ازاي ..انا مش مستوعب لحد دلوقتي ان انت عملت كده
هدى قالت ....خلاص يا نادر.... مش شايف حالته ....ولسه مش عارفين سيلم فين ... خلينا نهدى علشان نحاول نصلح اللي حصل
ادهم قال بدموع....... هو معاه حق في كل اللي قاله.... بس انا يعلم ربنا مقصدتش اجرحه انا كنت طول الفتره دي بحاول اتكلم مع مشاعر بحاول اراضيها واخليها ترجع للبيت وحاولت اكون وسيط ما بينهم بس رفضت تتكلم
هدى قالت باستغراب...يعني انت اللي خرجتها من البيت
ادهم قال بسرعه ..لا ابدا هيه اتصلت بيا بعد ما هربت باسبوعين ....لما روحتلها كانت لوحدها ومريضه جدا مش عارفه تتنفس ومكانش معاها اي حد ولا فلوس حتى ...اخدتها على المستشفى قالوا ضغطها واطي وعندها اكتئاب حاد وهياثر على الجنين... كان واضح جدا انها ما اكلتش بقالها كتير وكانت منهاره جدا ....حجزوها في المستشفى علشان حياة الجنين في خطر ..اول ما فتحت عينها بقت تترجاني مقولش لسليم وكانت و اضريت احلفلها اني مش هتكلم..وكنت حاطط في دماغي انها لما تبقى كويسه هقدر اقنعها ترجع
ابوه قال بذهول ...مقالتلكش ايه اللي وصلها للحاله دي
قبل ما تمشي من البيت كانت كويسه قوي
ادهم قال بحزن...ما قبلتش تتكلم ولا تقول اي حاجه وما قدرتش اضغط عليها خوفت تهرب تاني او تتعب ...اجرت لها مكان قعدت فيه و امنت لها اكل وشرب كانت في واحده جنبها اديت لها فلوس علشان تخلي بالها معاها ....ومكلمتنيش ابدا بعدها غير يوم الولاده..روحتلها ووقفت معاها وكتبت الطفل...وقولت الحمد لله انها ولدت بخير واول ما تبقى كويسه هكلمها وارجعها ... بس رفضت برده تتكلم وكنت كل ما اكلمها تنهار ... ما عرفتش اعمل ايه بقيت بينهم غصب عني
..... وهو كده ما خانش اخوه
هدى قالت بسرعه .....لا ما خانوش يا نادر..... اللي حصل فيه ده ابني وانا عرفاه ...هو صحيح بيحب مشاعر وبيموت فيها وابصم بالعشره انو عمره ما يقصد يزعلها.....بس كمان الغرور قاتله فاكر انو بيدير حياته على مزاجه ولا بد ما هيكون عمل بلوه ....المهم دلوقتي نحاول نصلح الغلط مش نعرف مين الغلطان
نادر اتنهد وقال .....مشكلتنا في اغلاط مش عارفين هيه ايه اصلا علشان نصلحها
وبص لادهم وقال .... زي ما سر مشاعر كان معاك ....انا متاكد ان سر سليم كمان معاك....قولي يا ابني ايه سبب زعله مني طول العمر ده..وايه سر الجمله اللي قالها الصبح ....لازم تحكي لي يا ادهم ....ما ينفعش تبقى بير غويط للدرجه دي.... في ناس بتتدمر بسبب سكوتك
بقلم...زهرة الربيع
ادهم وقف وبص بعيد عنه وقال بتوتر... يا بابا انا قلت لك قبل كده اني ما اعرفش ايه اللي مزعله منك
ابوه وقف وقال بغضب.... لا تعرف...تعرف يا ادهم انت الوحيد اللي تعرف وهتحكي لي ..مش ينفع تخبي اكتر من كده ...انا لازم افهم ...اخوك حرقني بالللي قالو ..اتكلم يا ادهم علشان خاطري
ادهم بلع ريقه بتوتر وبقى مش عارف يتصرف ازاي
عند سليم كان واقف بيبص قدامه بتعب ودماغه هتتفرتك من التفكير
مشاعر شافت ان مفيش فايده من السكوت وانها لازم تتكلم قربت منه وقالت بتوتر وحرج.... انا عارفه انك....احم اتصدمت باللي حصل...بس والله ادهم مكانش يقصد...انا ورطته واتصلت عليه بعد ما هربت وحلفتو واترجيتو كتير....وهو على حسب تفكيره كان متخيل ان لسه في طريق بينا وكان حابب يصلح ... لو كان يعرف ان كل شئ انتهى مكانش اتدخل من الاول
سليم بصلها بدهشه وقال...نعم...كل شئ انتهى...انتي بتتكلمي عن مين...تقصدينا بالكلام ده
مشاعر قالت بضيق..انا اقصد ابرر موقف
ادهم ..ومش حابه اتكلم في حاجه تانيه
سليم حط ايده في جيوبه وقال ...لا معلش انتي هتشليلي ادهم على جنب خالص انهارده ...ادهم اخويا ومش اي اخ ...وغضبي منو عتب مش كره
وقرب منها وقال بحزم...خلينا في اللي جينا علشانو .. هنتكلم بعيد عن اي حد ....مكان زي ما انت شايفه ما فيهوش مخلوق وهيساعدك تتكلمي
بصيت حواليها و كان المكان مقطوع قالت بتوتر..انت ...انت قصدك ايه
سليم قال بسرعه...قصدي اني مش هفضل مستني اتفاجأ كل شويه بحاجه ...وقتك معايا خلص ولازم تتكلمي لاني مليت
مشاعر قالت بزهول ..نعم....اوعى يكون اللي في بالي صح يا سليم... انت قصدت نيجي هنا علشان كده
سليم قال بسخريه ....بالظبط
مشاعر اتسعت عنيها بذهول وقالت.... يعني ايه.... وانا اللي بغبائي فاكره انك منهار وبحاول اهون عليك.... طب يلا اتفضل رجعني على البيت.... ومش كل شويه افكرك ان عندك طفل رضيع مش هينفع اتاخر عنه
ولسه هتروح ناحيه العربيه شدها بقوه و بص في عيونها جامد وقال .....مش هنمشي من هنا يا مشاعر غير لما تحكي لي هربتس من البيت ليه ....كل ما تتكلمي اسرع هترجعي لابنك اسرع
مشاعر اتسعت عيونها بذهول من الجديه اللي في كلامه ولسه هتتكلم سبقها وقال بتاكيد ......لو فضلنا هنا شهر لقدام مش هرجعك البيت لابنك غير بعد ما تتكلمي ووووو
انطلقوووووووو
مش هترجعي لابنك غير لما اعرف هربتي من البيت ليه...كل ما تتكلمي اسرع هترجعي لابنك اسرع اخلصي اتكلمي عشان انا جبت اخري منك
مشاعر قالت بغضب ....تعرف انا اللي غلطانه لاني فكرت ان عندك دم ومجروح من اللي حصل وجيت وراك.... اتفضل رجعني وبلاش لعب عيال
سليم قرب منها وقال.... الظاهر انك مش سامعه الكلام اللي بقوله.... او لسه مش مستوعبه.... مش هنمشي من هنا غير لما تتكلمي ...وانتهى
مشاعر بصتلو بدهشه وقالت..... هو ده مش هزار يعني....سليم بلاش استهبال الولد لوحده في البيت
سليم قعد عند الشجره وسند ضهره عليها وغمض عيونه وقال بهدوء ..... النهارده بالذات ما عنديش اي طاقه ارغي معاكي... هتيجي تقعدي جنبي هنا وتتكلمي هنمشي.... مش هتتكلمي ادينا قاعدين... الجو جميل
مشاعر قلقت جدا واتيقنت انها وقعت في مصيدته وانه قصد يجيبها هنا علشان يضغط عليها برجعة البيت وتتكلم ....جذبت شعرها لورا بتوتر شديد وهي مش عارفه تعمل ايه و مش مصدقه انه قدر يضحك عليها بالبساطه دي
اما في البيت كان ادهم في قمة التوتر ومش عارف يقول ايه لابوه اللي كان مصر جدا يعرف سليم زعلان منه ليه قال بارتباك.... صدقني يا بابا انا لو اعرف كنت قلتلك من الاول ...وبعدين انت عارف سليم يعني ما بيقولش حاجه لحد
ابوه قرب منه وعيونه بتلمع بالدموع وقال برجاء..... انا عارف انك مش عايز تقول علشان ميزعلش منك ...بس ارجوك احسبها بالعقل يا ابني وارأف بحالي ...انا هتجنن واعرف مالو... نظرات اخوك ليا بتوجع قلبي.... ما بقتش قادر استحمل انا تعبت وكبرت ونفسي اراضيه قبل ما اموت
ادهم قال بسرعه ولهفه .....بعيد الشر عنك يا بابا ما تقولش كده
ابوه قال بدموع ....يا ابني الموت حق علينا... كلنا هنموت.. انا بترجاك يا ادهم بلاش تعتبرني ابوك.... اعتبرني راجل كبير في السن قلبه اتحرق من بعد ابنه عنه.... ارجوك
ادهم لمعت الدموع في عينيه وبقى في موقف لا يحسد عليه ابدا ..اتنهد بحزن وقال..... لما كنا.... كنا بنعمل الفحوصات عشان عمليه الفصل بيني وبينه .....يومها سمعناكم انا وسليم ....احم سليم سمع اللي انت قولته للدكتور
نادر اتسعت عينيه بشده ورجع لورا بصدمه شديده
وهدى لطمت على خدها وقالت بذهول.....
عند سليم كان قاعد بيأس شديد ومشاعرك كانت رايحه جايه بغضب وبتقول...يا سليم بلاش جنان ....هات المفاتيح خليني امشي ....لو انت حابب تقعد خليني انا امشي حرام عليك ابنك
سليم قال بتعب... ابنك طبيعي بينام طول النهار ويصحى بالليل ....وبعدين هو دلوقتي بقى ياكل و ابتسام بتخلي بالها منه قلقانه من ايه
مشاعر قالت بدهشه... ازاي يعني قلقانه ليه...لو عيط مش هيعرفو يسكتوه ..وبعدين انا مش هرتاح غير وانا شايفاه قدامي
سليم ابتسم بسخريه وقال.... انتي اللي مش عايزه ترجعي له..لو حابه نرجع اتكلمي وخلصيني
مشاعر قالت بغضب وعند...كده ...طب مش هقول لك حاجه يا سليم.... ولو انت فاكر انك هتضغط عليا كده انا دراعي مابيتلويش.... وادينا قاعدين لما اشوف ابنك هيهون عليك قد ايه
وقعدت وسندت ضهرها على الشجره من الناحيه التانيه
سليم ابتسم بسخريه وقال بوجع ظاهر في صوته ....تفتكري ابني ممكن يهون عليا قد ايه....او اي ابن عموما ممكن يهون على ابوه قد ايه ....ممكن يهون عليه انه يعيط ....او يتوجع... او يتكسر
ولمعت الدموع في عيونه وقال بحسره .... او يموت
مشاعر اتسعت عنيها بدهشه من كلامه وقربت شويه منه واتفاجئت اكتر لما شافت الدموع في عيونه
كانت حابه تسأله ماله بس خافت يسكت وميتكلمش وهيه كانت عايزاه يخرج اللي جواه قالت ...لا مستحيل اي اب يهون عليه ان ابنه يموت....متحصلش ابدا
سليم ابتسم بوجع ووقعت دمعه على خده وقال .... بس انا هنت عليه...تخيلي .... انا مش زعلان منه قد ما زعلان على نفسي.... للدرجه دي ما استاهلش اتحب....ده حتى الحيوان بيتحب من ابوه وامه
مشاعر استغربت كلامه بس كانت متاكده انه بيتكلم عن ابوه قالت....انت فاكر ان ابوك مش بيحبك
سليم بسخريه وقال بوجع.... لا انا الحمد لله رب العالمين متاكد
...اتاكدت بنفسي وسمعت بوداني
هنا حس بايد مشاعر على ايده
التفت لها باستغراب وهي بصت لعيونه وقالت بدعم... انا معاك...وحابه اسمعك
سليم غمض عينيه وقال بوجع ما يتوصفش..... اتولدت انا وادهم توام ملتصق ...وكانت عملية الفصل صعبه جدا في سن صغير و فضلنا بجسم واحد لحد عمر العشر سنين...في الوقت ده كنا بنتجهز علشان هنعمل العمليه ومرتبين لكل حاجه...وفي يوم روحنا المستشفى نعمل الفحوصات وبعد ما طلعت النتيجه نادر بيه طلعنا بره الاوضه علشان يتكلم مع الدكتور في تفاصيل العمليه
كنت طفل شقي حبه وكان عندي فضول اسمعهم بيقولوا ايه ....ادهم ما كانش حابب وبيقول لي حرام نتصنت عليهم.... بس انا كنت هموت واعرف هيعملوا فينا ايه...و طبعا ما اقدرش عليا ورحنا.....و يا ريتني كنت اتشليت وقتها وما رحتش
مشاعر كانت بتسمعه باهتمام ومستغربه حالته جدا...كان لاول مره ما يقدرش يسيطر على دموعه وتنزل قدامها
وكمل بوجع وقال.....الدكتور قال ان فيه بعض المشاكل هتحصل اثناء الفصل.... هتأدي لموت واحد فينا بنسبه كبيره قوي....يعني واحد هيطلع كويس بدون مشاكل و التاني الله اعلم عاش او مات هو وحظه ..وطلب منو....طلب منو يختار الطفل اللي عايزه يطلع كويس علشان يعمل حسابه في العمليه
تفتكري رد قال له ايه
مشاعر مكانتش عارفه ترد بايه ...وسليم نزلت دموعه بحسره وقال.....قاله حافظ على ادهم
بقلم....زهرة الربيع
مشاعر اتسعت عينيها بذهول وما بقتش مستوعبه اللي بيقولوا وقالت بسرعه.... لا طبعا... انت كنت طفل وقتها اكيد فهمت حاجه غلط ...مستحيل يختار بينكم
سليم ابتسم وسط دموعه وقال..... لا اختار....سمعتو كويس...قالو حافظ على ادهم ...وان شاء الله سليم هيبقى بخير ....و فعلا ادهم طلع وفاق من العمليه وهو كويس جدا زي ما اتمنى....و انا فضلت اسبوع في العنايه ....بس الالم والوجع عاش معايا عمري كلو مش قادر انسى الكلمه دي..... مش قادره انسى احساسي وقتها ....حتى ادهم لم سمع الكلام مسك ايدي بقوه وخوف ما كانش عايز نعمل العمليه...... وانا كل اللي كان بيدور في دماغي انه ليه اختار ادهم...ليه بجد....هو..... هو مش انا ابنه زيه.... ليه ضحى بيا يا مشاعر .. تفتكري ليه.... .... ما حدش عنده اجابه.... لكن اكيد العيب فيا..... ابويا فرط فيا بسهوله ...واخويا وحبيبي اللي طول عمرنا واحد طلع عارف بعذابي من الاول وبيساعدك ومفكرش فيا....وحتى انتي.... انتي كمان مش قادره تستحمليني....ويمكن زمانك بتقولي يا ريتك كنت مت وقتها
قال كده ولسه هيقوم بس اتفاجئ لما مشاعر وقالت ببكى.... انت بتقول ايه.... انت مجنون .. بعيد الشر عنك ...انا لو مهما زعلت منك عمري ما اكرهك يا سليم....انا ياما اتمنيت الموت لنفسي ومقدرتش اتمناه ليك ...اقسم بالله ما اقدر على وجعك مهما وجعتني
سليم اتفاجئوكان بيتمنى تكمل وتحكي له اللي في قلبها بس مشاعر سكتت وهو بقى وقال..... انا بعشقك مش قادر استحمل بعدك مش قادر...انا معرفتش ارتاح واعيش واضحك غير بعد ما عرفتك..... خليكي جنبي خليكي في ما تسيبينيش انا مليش غيرك
مشاعر فضلت شويه بس فاقت لنفسها وحست باللي بتعمله وافتكرت كل اللي حصل معاها بعدت عنه وقالت...احم... خلينا نرجع البيت.... ابنك زمانه بيبكي
سليم مسح دموعه بايده وقال بخنقه منها...تاني... انا قلت لك مش هنمشي من هنا غير لما تتكلمي..... ما توجعيش قلبي.... انا ما بقتش قادر اعافر زي الاول
مشاعر اتنهدت وحاولت تتكلم بهدوء علشان حالته وقالت .....انا مقدره اللي انت فيه.... فحاول تراعي اللي انا فيه..... انا مش قادره اتكلم دلوقتي .....ومش قادره احكي حاجه....قلبي لسه مخنوق مش قادره ... معلش سيبني على راحتي
سليم وقف وقال بغضب.... راحتك ده اللي هو لحد امتى.... لحد ما نبعد اكتر .....لحد ما نكره بعض ..لحد ما نخسر بعض يا مشاعر
مشاعر وقفت وقالت والدموع بتلمع في عينيها..... في جميع الاحوال احنا خسرنا بعض يا سليم ....فلو سمحت بلاش نخسر الود اللي قال عليه ربنا ...عايزه ارجع لابني
قالت كده وطلعت في العربيه وسليم جذب شعره لورا بضيق شديد وهو مش عارف يعمل ايه اكتر من كده علشان تتكلم
في الوقت ده جاله مكالمه من غاده رد وقال بضيق ..... اخيرا البرنسيس حنت علينا وفتحت تليفونها
غاده ردت بحرج وقالت..... اسفه يا سليم صدقني الفتره اللي فاتت نفسيتي ما كانتش احسن حاجه ....انا حابه نتكلم شويه ممكن
سليم قال بضيق .... خلاص هعدي عليك بالليل
غاده قالت بسرعه ....لا انا قريبه من بيتك هستناك هناك..... الكلام اللي هقوله عايزه مراتك تسمعه
سليم اتنهد بخنقه وقال..... غاده بلاش مشاكل انا بجد مش ناقص
بس غاده قالت بسرعه..... بس مراتك هي اللي بتعمل مشاكل يا سليم ولا ناسي اخر مره جيت معاك البيت عملت فيا ايه.....المشاكل مش هتخلص غير من عندها ....مستنياك
قالت كده وقفلت وسليم ركب العربيه جنب مشاعر وقال بتوتر ....غاده في البيت
مشاعر ابتسمت بسخريه وقالت.....بجد.... طب يلا يلا سوق بسرعه بقى لحسن تمشي .... كنسل اي حاجه تانيه مش مهم بقى
سليم اتنهد وقال ....مشاعر انتي اللي رافضه نفضل هنا وعايزه تروحي لابنك..... لو حابه نقعد ونتكلم انا هكنسل اي حاجه فعلا علشانك
مشاعر قالت بسرعه..... لا شكرا..... انا مش حابه اتكلم معاك .....اتفضل رجعني لابني
سليم قال بتوتر .....طيب هي بتقول انها ...احم انها هتتكلم معاكي...لو سمحتي ما تعمليش عقلك بعقلها.... انتي عارفه انها صغيره و...
مشاعر قاطعته وقالت بانفعال....ايه ايه ايه....هي مين دي اللي صغيره..... صغيره بالنسبه لك يا بابا ...انما بالنسبه لي كبيره وبغله كمان... الفرق بيني وبينها اقل من سنتين ولو قلت ادبها هديها على دماغها ودماغ اللي يتشدد لها على فكره
سليم بص لها بغيظ شديد من كلامها بس حاول يهدى علشان ميصعدش الامور اكتر... وساق على البيت وهو بيحاول يعدي اليوم اللي كان فعلا من اصعب ايام حياته
اول ما وصلوا عند البيت مشاعر دخلت بسرعه ولقت هدى قاعده وشايله ابنها قالت بلهفه.... صحي ...عيط مش كده
هدى ابتسمت وناولتها الولد وهي بتقول .....ما تقلقيش يا حبيبتي هو كويس.... يا دوب صحي
في الوقت ده دخل سليم وهدى جريت بقلق عليه ودموع وهيه بتقول....حرام عليك وجعت قلبي
سليم طبطب عليها وقال..انا بخير
اما نادر كان واقف من بعيد و عيونه بتلمع بالدموع بسبب اللي عرفه..وحتى ادهم كمان كان قاعد وبيبصوا له بتوتر وخجل بس ما حدش فيهم فتح اي كلام عشان وجود غاده
غاده قالت.... ازيك يا سليم
سليم قرب منها وقال بضيق.... اخيرا افتكرتي سليم.... معقوله اجي لك على البيت ترفضي تقابليني
غاده قالت بسرعه .....والله انا لما عرفت اتخانقت مع بابا وقلت لهم ميصحش برده انك ما تدخلش.... بس انت اكيد مقدر موقفي صح
سليم قعد بضيق وقال..... والله انا مش عارف الصراحه اقدر موقف مين ولا مين
قال كده وهو بيبص لادهم بسخريه
بقلم...زهرة الربيع
ادهم نزل عيونه في الارض بحرج....و مشاعر قالت بضيق طيب يا جماعه عن اذنكم.... انا هطلع انيم ابني
هنا غاده قالت بسرعه .....مشاعر انا عايزاكي .....عايزه اقول حاجه قدامكم كلكم ...وقدامك انتي بالذات
مشاعر اتنهدت بضيق وقعدت جنب هدى بهدوء
غاده لسه هتتكلم سليم جاتلو مكالمه من طه قال بسرعه ....معلش يا غاده.... ثواني بس دي مكالمه مهمه من المكتب
غاده ابتسمت وقالت..... تمام بس بسرعه علشان مش هتكلم غير لما تيجي
سليم قال دقيقه واحده
وطلع في الجنينه رد وقال.... خير يا طه
طه قال بسرعه...... مش خير ابدا يا باشا.....انا فرغت الكاميرا اللي لقيناها في مكتب حضرتك...اتضح انها في مكتبك من وقت طويل جدا ....تقريبا من ايام ما كان نادر بيه بيشتغل معاه ....يعني بقاله ما يقارب على تلت سنين بيراقب المكتب
سليم حط ايده على دماغه بتعب وقال ....ما تفاجئتش خالص ....عارفه حقير ويطلع منه اسوء من كده ...هو قصد يحطها في الفازا الاثريه علشان يضمن انها هتقعد وقت طويل ..وانا اللي كنت زعلان انها اتكسرت...يلا حصل خير
ولسه هيقفل طه قال بسرعه .....بس في حاجه غريبه ظهرت في مقطع من سنتين
سليم قال باستغراب..... حاجه ايه دي
طه قال ......افضل تشوفها بنفسك عشان انا لحد دلوقتي مش فاهم .....هبعت لك مقطع فيديو
سليم قال..... طيب بسرعه عشان انا مستعجل
وقفل معاه و ما فيش ثواني ووصل له فيديو فتحه وكان مقطع ليه وهو في المكتب بتاعه
سليم استغرب ايه العجيب في كده بس
عاد المقطع تاني وتالت واتاكد انها هي وكان هيقع من طوله لما افتكر اللي حصل في المكتب وقتها ...اللي حصل يومها مستحيل ينساه ....نطق بالعافيه وقال ...يانهار مش فايت وووووو
