العشق المصراوي للكاتبه اسراء ابراهيم
تعدي
ضحكت فاطمة بفرحة من غيرته عليها وقالت له بحب
خلاص هغير الأول
قالت كلامها وقفلت الباب في وشه
اتصدم أنس من اللي عملته وابتسم بحب
ماشي يا فاطمة أنا بخزنلك على فكرة
خبطت سيدة على صدرها وهي بتقول بغضب
يا مري إنتي اتخبلتي يا فاطمة خليتيه ينام في أوضة تانية ليلة دخلته هو ده اللي وعيتك عليه
فاطمة بحزن
ما هو يا ماا ضايجني لما جاب سيرة أدهم خطيبي الأولاني وإني لسه بحبه
سيدة بضيق
حجة ما هو من ساعة ما خطبك وإنتي ما بليتيش ريجه بكلمة واحدة
وبعدين ياختي بيدلع عليكي إيه هتجفيله عالواحدة
يا مري منك والله يا فاطمة لو ما راضيتيش جوزك لأكون غضبانة عليكي
فاطمة بلهفة
لا حقك عليا ياما حاضر والله هراضيه
سيدة بقلق
يا مري لو كان قال لحماتك على اللي هببتيه ده كان زمانها فضحتك
وبتداري ليه كده بس يا بتي
ما كملتش كلامها وسمعوا صوت عالي فوقفت بقلق
يا مري حماتك يا فاطمة باينها عرفت
فاطمة بانقباض قلبها واتكلمت بتردد
لا ياما أنا متأكدة إن أنس لا يمكن يقولها حاجة زي دي
سيدة بقلق
أومال إيه الصوت ده تعالي نشوف وتعملي اللي قولتلك عليه يا فاطمة سامعة
فاطمة بتوتر
حاضر ياما والله ربنا يستر أنا خايفة من حماتي جوي
سيدة بقوة
چمدي قلبك يا بتي ويلا بينا
خرجوا مع بعض واتفاجأوا بأنس وهو بيلعب طاولة مع كامل وصوتهم عالي جدا
عرفة ابتسم لفاطمة وبص لسيدة اللي حركت راسها بإيجاب فاطمئن إنه مطمئن على بنته
عرفة بابتسامة
يعلم ربنا يا أنس يا ولدي إنت في معزة كامل وفاطمة
أنس بابتسامة
ربنا يخليك يا عمي
يلا يا فطوم قومي حضريلنا الغدا ولا شكلي خدت فيكي مقلب ومبتعرفيش تطبخي والله لأرجعك معاهم تاني
فاطمة بغيظ
بجي كده ماشي يا أنس
ضحكوا كلهم على اللي حصل بس قطعهم جرس الباب راح أنس يفتح ولقاها أمه وأخته نورهان
أنس بحب
أهلا يا أمي اتفضلي
سيدة بحرارة
أهلا يا ست فاتن ألف مبروك ياختي عقبالك تفرحي بعوضهم
فاتن ببرود
أهلا بيكي مش من الأصول برضه كنتوا تخبطوا عليا
بصت سيدة لعرفة بتوتر فأنس اتكلم عشان يفهمهم
أصله كانوا جايين جايبين حاجات كتير يا ماما مش جايين فاضيين وبعدين هنا وهنا واحد تحت بيتي وده بيتي وبيت بنتهم
كامل مكنش مركز لأنه كان مشغول بنورهان من أول ما دخلت وهي كانت ملاحظة ده ومكسوفة أوي ودقات قلبها بتزيد ابتسمت بخجل ووقفت جنب فاطمة
عرفة بجدية
يلا يا سيدة هلمي بينا كويس إننا اطمنا عليكي يا بتي الله يهدي سرك
أنس بإصرار
والله أبدا يا عمي عشان خاطري لو ليا غلاوة عندك نتغدى سوا ونشرب الشاي وبعدين تمشوا
سعد بود
غلاوتك يعلم بيها ربنا يا ولدي بس حدايا مصالح لازم أراعيها مرة تانية إن شاء الله يلا يا سيدة يلا يا كامل
كامل بابتسامة
متنساش الموضوع اللي حدثتك فيه يا جوز أختي ياريت تعجل وتطمني
نظرات كامل لنورهان أكدت لفاتن إن الموضوع يخص ارتباطها بيه فاتضايقت أوي وقررت تتدخل
أنس بابتسامة
إن شاء الله يا كامل اللي فيه الخير يقدمه ربنا
فاتن بتدخل
مش تباركي لفاطمة يا ست سيدة
استغربوا كلهم حتى نورهان اللي حست بانقباض قلبها وبلعت ريقها بتوتر وبصت لفاطمة بخوف
سيدة باستغراب
ألف مبروك يا أم أنس بس على إيه
فاتن بابتسامة باردة
أصل معتز ابن أخويا اتقدم لنورهان وهي وافقت وإن شاء الله هنقرأ الفاتحة يوم الخميس الجاي عقبالك لما تفرحي بابنك
اتصدموا كلهم حتى أنس اللي لأول مرة يسمع الكلام ده وكمان كامل اللي بص لنورهان بصدمة وحزن وهي حركت راسها برفض وكأنها بتقوله محصلش
نورهان بهمس والدموع في عينيها
متسيبنيش
ابتسم كامل ببساطة وكأنه بيطمنها وبص لفاتن بجدية وقال
كيف وأنا جاري فتحتها امبارح مع أخوها وراجلها يا حجة فاتن واتفقنا كمان على كل حاجة
بصت نورهان بصدمة لكامل وهي مش مستوعبة اللي قاله وسمعت صوت أمها العالي اللي كانت متوقعاه بعد اللي حصل
فاتن بغضب
الكلام ده صحيح يا أنس أنت قريت فاتحة أختك مع كامل ده رد عليا فهمني
أنس بجدية
أيوه يا ماما حصل كامل طلب إيد نورهان مني امبارح وأنا وافقت لأنه إنسان كويس وأنا عارف إنه هيصون أختي ويحافظ عليها قريت الفاتحة وإن شاء الله هنعمل كتب الكتاب على طول والدخلة كمان كام شهر
فاتن بعصبية
وأنا ماليش لازمة مش كده خلاص موتني وأنا عايشة صح يا أنس
أنس بهدوء
يا ماما متقوليش كده حضرتك الخير والبركة وبعدين لو كنت شايف إنه إنسان وحش مكنتش وافقت أصلا انتي مكبرة الموضوع والله
فاتن بصوت عالي
على جثتي يا أنس لو الجوازة دي كملت واعرف إن لو جوزت أختك ليه لا أنت ولا هي ولادي ولا هعرفكم وهفضل غضبانة عليكم لحد ما أموت وانتي من النهاردة مش
هشوف وشك فاااهمة
قالت فاتن كلامها وخرجت من الشقة وانهارت نورهان على
الكرسي وهي بتعيط وفاطمة جنبها بتحاول
كل ده وكامل بيبص لنورهان وقلبه بيتقطع عشانها
كامل بإصرار
لو سمحت يا أنس أنا عاوز أكتب كتابي على نورهان الليلة
سيدة بتردد
لا يا ولدي ميصحش اللي بتقوله ده
أنس بتأكيد
كامل عنده حق يا ماما وده اللي المفروض يحصل أنا مش ههدم سعادة أختي عشان أرضي أمي وتصرفاتها اللي ملهاش أي مبرر
بص له كامل بفرحة ولمعت عينيه واتكلم
يبجي خلينا نكتب الكتاب الليلة يا أنس
أنس وهو بيضحك
إنت مستعجل كده ليه ولا جت مصلحة ليك لا خليها بإذن الله يوم الخميس عشان ده كتب كتاب أختي وبنتي حبيبتي ولازم يبقى يوم مميز
ابتسمت نورهان بدموع وهي بتبص لأخوها
ربنا يخليك ليا يا أنس
أنس بحنية
ويخليكي ليا يا نور عين أخوكي
كل ده بيحصل تحت نظرات فاطمة الفخورة بجوزها وحمدت ربنا في سرها على اختيارها ليه حاولت وقتها تخفف عنه وتعدي جو التوتر
فاطمة بخبث
احم احم إحنا هنا على فكرة ولا خلاص بجي ماليش مكان
ضحك أنس بصوت عالي
يا فطوم ده انتي نور عيني وحياتي كلها أقدر أنساكي برضه
ابتسمت فاطمة بخجل وكانت فرحانة بكلامه أوي بس عملت نفسها لسه زعلانة لأنها مقررة تراضيه بينهم وبين بعض
بعد أسبوع كان يوم كتب كتاب كامل الكل كان في الجامع الكبير اللي جمب بيت أنس
في مصلى السيدات كانوا بيتابعوا اللي بيحصل ونورهان رغم فرحتها بشكل كامل وهو حاطط إيديه في إيد أنس بس عدم وجود أمها معاها مخليها حزينة أوي وصعبان عليها نفسها
اتفاجأت بصوت أمها من وراها وهي بتنادي عليها
وأول ما لقت فاطمة جاية معاها من بعيد جريت نورهان وهي بتعيط بفرحة
حاوطتها فاتن بندم حسيته بصوتها
فاتن بحزن
حقك عليا يا بنتي عارفة إني كسرت فرحتك بس أنا كنت حاسباها غلط
نورهان بلهفة
أنا اللي آسفة يا أمي متزعليش مني والله كامل راجل كويس أوي وانتي بس اديله فرصة
فاتن بحب وهي بتبص لفاطمة
مش هو بس اللي قررت اديله فرصة يا فاطمة لولا إنك جيتي وقعدتي تكلمي معايا وتحنني قلبي عشان أحضر فرحك مكنتش عارفة هفوق لنفسي امتى
كان كل همي إن أنس ياخد بنت أنا أختارها بس لما فكرت لقيت إنها كان مستحيل تعمل ولا تستحمل اللي فاطمة عملته واستحملته مني سامحيني يا فاطمة يا بنتي
فاطمة بفرحة وحب
وه العفو يا
ماما ربنا يخليكي لينا
خلص المأذون لما قال جملته الشهيرة
بارك الله لكما وبارك عليكما وجمع بينكما في خير
والزغاريط علت
سيدة بفرحة
دلوقتي بجي عندي تلات بنات
خرجوا كلهم برة واتفاجأ كامل وأنس بفاتن اللي بتزغرط بفرحة
جري أنس وهي طبطبت عليه بحنية
أما كامل فقرب من نورهان بلهفة ومسك إيدها
مبارك عليا يا نورهان دلوك الفرحة فرحتين مش كده
نورهان بخجل
الله يبارك فيك يا كامل متتصورش أنا فرحانة ازاي كنت سعيدة أوي لما بقيت مراتك بس زعلانة وقلبي مكسور إن أمي مش جمبي بس دلوقتي خلاص أنا أسعد واحدة في الدنيا وخصوصا إنك متخلتش عني زي ما وعدتني
كامل كان في عالم تاني بيسمعها بقلبه بس مجرد كلمات منها عزفت بيها على أوتار قلبه وخلته متيم بيها أكتر واتمنى لو تكون قدامه في بيته دلوقتي
أقسم إنه وقتها كان خباها بين ضلوعه ومش هيسمح لمخلوق يقرب منها لأنها الملكة الوحيدة على عرش قلبه
كامل بتنهيدة
يا ريتنا كنا لوحدينا دلوقتي وانتي بتقوليلي الحديت ده عاد متعرفيش كنت عملت إيه وبعدين انتي بتقوليلي الحديت ده دلوقتي عشان حوالينا ناس خابرة لو لوحدينا كنتي هتتكسفي ومش هتجولي حاجة
نورهان بخجل
بصراحة آه مكنتش هقدر أقولك كل ده بجد ربنا يخليك ليا يا كامل
كامل بهيام
ويخليكي ليا يا جلب كامل وعمره كله
كانوا متابعين كامل ونورهان من بعيد أنس وفاطمة اللي ماسكين إيد بعض وكأنهم انتصروا في معركة
لحد ما همس أنس لفاطمة
أنس بهمس
مش هتصالحيني بقى يا فطومتي
فاطمة بتكشيرة
نعم وهو أنا اللي زعلتك ولا إيه عاد بجولك إيه بلاش الشغل ده يا أنس أنا خابراك زين هه
أنس بتمثيل
أنا يا بنتي ده أنا غلبان والله هو بزمتك في عريس ينام لوحده ليلة دخلته إلا لو غلبان
فاطمة بضحك
أيوة وتستاهل على فكرة عشان بعد كده تبطل تخبط في الحديث هه
أنس باستسلام وهو بيرفع إيديه لفوق
حرمت يا بيه إنتي بس حني عليا وخليني أرجع أوضتي
فاطمة بخجل
أممم أفكر وبعدين أنا أخدت على النوم براحتي بجه بص ممكن أفكر يعني أخليك تيجي تبات جاري خميس وجمعة بس
أنس برفعة حاجب
نعم لا أنا كده هاعمل اعتصام وهلجأ للقضاء العاجل ياااا ماما سيدة
فاطمة بسرعة
يا مري خلاص اسكت هخليك ترجع تنام فيها وأمري لله أحسن أمي لو عرفت مش بعيد تجتلني
أنس بهيام
بعد الشر عنك يا قمري أومال أنا روحت فين بس عموما أنا كده عرفت سكتك لو زعلتيني هروح لأمك وهي هتجيبلي حقي
ضحكت فاطمة بخجل ووقتها أنس اتنهد براحة وهو سرحان في عينيها
أنس بهيام
بحبك أوي يا فاطمة أنا عمري ما تخيلت إن العشق الصعيدي
فاطمة بسعادة
وأنا كمان بحبك جوي يا أنس ومكنتش أتخيل إن العشج المصراوي واعر وحلو جوي اكده
تمت
