كوب قهوة بقلم انجي الخطيب
بقرار التمكين اللي هينفذ فوراً.
شيرين برقت عينيها وقالت بصوت واطي ومستفز تمكين إيه يا حضرة الظابط؟ ده بيت أخويا! وهي اللي مش عايزة تدفع اللي عليها.. دي واقعة وقعة عادية في المطبخ!
بصيت لها من ورا الشاش، وبصوت هادي بس طالع من وسط الوجع، قلت القهوة مابتوقعش على الوش يا شيرين.. القهوة بتتدلق بقصد. والبيت ده؟ البيت ده بيت أميرة المنشاوي.. اللي إخوكي عاش فيه سنين وهو مش دافع فيه مليم، وكان بيوهمني إنه بيصرف وهو بيسرقني.
إيهاب عروقه برزت وبدأ يفقد أعصابه إنتي اتجننتي يا أميرة؟ بتطرديني من بيتي قدام الناس؟ ده أنا أدفنك مكانك!
الظابط خطى خطوة لقدام أستاذ إيهاب، لم لسانك وإلا هتتكلبش دلوقتي بتهمة تهديد مجني عليها قدامنا. اتفضل لم هدومك وحاجاتك الشخصية، أنت وأختك، لأن الشقة دي بناءً على الأوراق اللي قدمتها الأستاذة، هي ملكية خاصة
السقوط
الساعة اللي بعدها كانت تشفي حقيقي. شيرين كانت بتلم شنطتها وهي بتبرطم وتشتم في سري، وإيهاب كان زي التور الهايج بس متكتف بوجود الشرطة.
فتحت الدرج وطلعت ملف أسود استنى يا إيهاب.. قبل ما تمشي، خد فكرة عن المحضر التاني اللي المحامي بتاعي بيقدمه دلوقتي في نيابة الأموال.
إيهاب وقف مكانه، وشه بقى أبيض زي الورقة.
فاكر التوكيل اللي عملتهولك عشان تخلص إجراءات العربية؟ كملت كلامي بثبات أنا اكتشفت إنك كنت بتسحب مبالغ من حسابي وبتحولها لحساب أختك تحت بند ديون وهمية.. والنهاردة الصبح لما رفضت أدفع لشيرين، مكنش بس عشان الفلوس، كان لأني قفلت الحساب ده تماماً ونقلت كل مليم لمكان تاني عمرك ما هتوصل له.
شيرين صرخت إنتي نصابة! الفلوس دي حقنا!
رديت عليها بابتسامة مريرة
المواجهة الأخيرة
إيهاب قرب من الباب، وبص لي بصه كلها غل هندمك يا أميرة.. وربي لندمك. هتلفي حوالين نفسك عشان تاخدي الطلاق، ومش هطوليه.
الظابط ضحك بسخرية وهو بيسحب إيهاب من دراعه ده لو خرجت منها يا بطل.. التقرير الطبي لوحده كفيل يوديك ورا الشمس، غير تهمة التبديد. اتفضل معانا على القسم.
خرجوا من الباب.. شيرين بتعيط بانهيار لأن الحنفية اللي كانت بتصرف منها اتقفلت، وإيهاب ماشي مكسور العين قدام الجيران اللي كانوا واقفين يتفرجوا على الجنتلمان وهو خارج بالكلبشات.
قعدت على الكنبة، لوحدي. الشقة اللي كانت سجن، بقت فجأة واسعة ونضيفة.
الوجع اللي في وشي كان لسه موجود، بس لأول مرة من سنين، قلبي مكنش بيوجعني.
النهاية؟ لا.. البداية
في الشهور اللي جرت بعد الليلة دي، إيهاب حاول يبعت ناس يهددوني، وحاول يبعت رسايل اعتذار وندم وتمثيل إنه لسه بيحبني. بس القهوة المغلية سابت علامة على وشي، وعلامة أكبر في روحي.. علامة بتقول إن الرجوع للوراء هو الموت الحقيقي.
رفعت دعوى خلع، وقدمت كل الأدلة اللي تثبت سرقاته من حساباتي. وبمساعدة المحامي، قدرت أسترد جزء كبير من المبالغ اللي حولها لأخته، لأن التحويلات كانت غير قانونية.
النهاردة، وأنا واقفة قدام المراية، شيلت الباندج. في أثر خفيف للحرق لسه موجود عند رقبتي، بس لما ببص له، مابشوفش تشويه.. بشوف وسام شجاعة. بشوف ذكرى اليوم اللي قررت فيه إني أكون أميرة بجد، مش جارية في مملكة وهمية لراجل مبيعرفش يعني إيه رجولة.
خرجت البلكونة، شربت قهوتي بمزاج وهي دافية، وبصيت للسما وقلت الآن فقط.. بدأت حياتي.
تمت.
انجي الخطيب
