والدة صاحبتي
والدة صاحبتي قررت تفسخ خطوبة بنتها قبل شهور من الفرح وبعد ٣ سنين خطوبة.. البنت عارضت والدتها ووقفت في وشها مرة.. وحاولت تقنعها عشرات المرات.. بس مامتها كانت واضحة وحاسمة.. والأمر انتهى!
وفِي محاولة لتخفيف وطأة الحزن على نفسية بنتها وتشجيعها لاستعادة بهجتها وثقتها في نفسها بعتت لها رسالة وهي نايمة علشان اول ما تصحى تشوفها..
قالتلها كلام كتير ملخصه:
ان العلاقات اهل.. صحاب.. جواز.. لازمتها في الحياة إننا نطمن ونقدر نكون نسخة أحسن من نفسنا
فلما
لما يكسر خاطرك ويوعدك انه مَش هيكررها.. ويكررها تاني يوم.. ويوعدك وتسامحيه ويكررها لحد ما تفقدي الثقة فيه وفي نفسك
لما تعملي كل المجهود اللي بتعمليه دة علشان تحافظي على وجوده في حياتك وهو أول حاجة يعملها لما يزعل انه يهددك بوجوده في حياتك
لما تحطيه قبل أهلك ويحطك بعد واحد صاحبه يعرفه من يومين
لما ماتشوفيش غير الجانب الجميل الوحيد اللي فيه وميشوفش كل الجمال اللي جواكي ويفضل
لما كل دة يحصل يبقى لازم تفوقي وتنهي العلاقة.. وتفتكري رحمة ربنا إن عندك الفرصة تعملي كدة بسهولة احسن ما السكينة تسرقك وتصحي على كابوس مَش عارفة تتخلصي منه..
دة شخص بيأذيكي مَش بيحبك وانتي شجاعة وتقدري تنجي بنفسك..
رغم ان البنت لسة حزينة ورغم إن مامتها بقالها ٣ سنين بتنصحها وبتنبهها بس هي مش قادرة تسمع وتفتح عنيها وتفوق.. قامت من النوم عملت حاجة جميلة جدًا.. نقلت كلام مامتها على ورقة بخط كبير وعلقتها
"إنهاء العلاقات المؤذية هي شجاعة منح نهاية لمشهد حزين يستنزفنا.. إنهاء العلاقات المؤذية هو فعل نجاة!"
من أعظم النعم اللي ممكن تكون في حياة الانسان انه يكون في حد عاقل وحكيم في حياته.. يثق فيه ويحس إن معاه كتالوج متنوع من خبرات الحياة.. حد يقدر يرجعله يستشيره وياخد برأيه وهو مطمن.. يسمع كلامه لما ينصحه.. ويبقى متأكد إنه مهما اتخبط او اتلغبط فهو مع ذلك في طريق آمن!
💗 ضع بصمتك بالصلاة على النبي صلوات الله وسلامه عليه
