اخت جوزي وصحابتها
أخت جوزي وصاحبتها!
#حواديت_الاجانب
أنا عمري 28 سنة. أخت جوزي عمرها 23 سنة، هي أخته من الأم بس.
هي متعلقة بجوزي قوي، كمان جوزي بيحبها ومش بيقبل أي كلام سلبي عنها. وده السبب اللي خلاني أكتب هنا الأول قبل ما اتكلم مع جوزي.
أنا وجوزي اشترينا بيت السنة اللي فاتت فيه "حمام سباحة داخلي"، أخت جوزي كانت متحمسة جدًا لما شافته. وسألت لو ممكن تستخدمه هي وصاحبتها من وقت للتاني؟
وافقنا بشرط إنها تبلغنا الأول قبل ما تيجي.
فعلاً هي وصاحبتها "كلوي" زارونا كم مرة واستمتعوا بالسباحة.
في المرات دي جوزي ماكانش موجود تقريبًا ولا مرة، لأنه بيشتغل محامي وساعات شغله طويلة.
مع الحظر (سنة 2020) جوزي بدأ يشتغل من البيت.
أخت جوزي طلبت إنها تيجي عندنا تاني مع صاحبتها.
قولتلها بصراحة أنا مش مرتاحة للفكرة. لأني حامل ومش عايزة اعرض البيبي لأي خطر.
قالتلي طيب لو هي وصاحبتها عزلوا نفسهم في الحجر الصحي لمدة أسبوعين ممكن يجوا؟ جوزي قالها، تمام مفيش مشكلة.
بعد أسبوعين، وصلوا البيت، وجوزي كان في مكتبه. هما دردشوا شوية معايا وبعدين راحوا لحمام السباحة، وقعدوا تقريبًا ساعة.
جوزي خرج وقعد معايا في المطبخ، أخته دخلت تاخد عصير، وهي راجعة تاني للسباحة قالت لجوزي "كلوي" هتبقي مبسوطة قوي لما تشوفك!
استغربت كلامها لأن جوزي وصاحبتها مش قريبين من بعض!
بعد دقيقتين "كلوي" دخلت المطبخ وفضلت وقت طويل تتكلم مع جوزي وبس، لحد ما هو
كانت بتضحك ومبسوطة قوي وهي بتتكلم معاه وكان واضح عليها إنها بتعاكسه، وقبل ما ترجع للسباحة سألت جوزي إذا كان بيشتغل من البيت كل يوم؟ جوزي قالها آه.
بعدها أخدت بالي إن "كلوي" بتبصلي بنظرة غريبة!
على مدار الأسبوعين اللي بعد كده، أخته وصاحبتها بقوا يجوا البيت علشان يعوموا كل يوم. بس "كلوي" ما بتعومش وبتفضل تتمشى في البيت بلبس السباحة، وتستني لما جوزي يخرج من المكتب علشان يقعد معايا شوية، وبسرعة بتقاطعنا في الكلام وتتكلم معاه هي لغاية ما يدخل مكتبه تاني!
مرة عملت الغداء وكنت رايحة أنادي على جوزي. أخته وقفتني وقالتلي كلوي هتروح تقوله!
بصوا لبعض وكلوي كانت مبسوطة قوي وهي رايحة لجوزي المكتب.
لاحظت كمان إنها بتتعمد تمسك إيد جوزي.
السبب اللي مخليني متأكدة إن أخته كمان متورطة في الموضوع إنها بدأت ترمي كلام غريب بخصوص الحمل. حكيت لي عن صاحبتها وجوزها الخاين. وإن معظم الرجالة بيعملوا كده لما مراتاتهم بيكونوا حوامل. كمان قالت تعليق سلبي عن شكلي ووزني وأني بقيت طخينة جنب جوزي وشكلي غريب لأن جوزي جسمه رياضي!!
كمان أول ما بتشوف جوزي خارج من المكتب بتجري بسرعة تقول لصاحبتها.
أنا عارفة إن هرمونات الحمل مأثرة على تفكيري. علشان كده بسأل نفسي لو أنا ببالغ وبتخيل حاجات مش موجودة؟
هي بعتتلي رسالة دلوقتي بتستأذن تيجي تعوم تاني الأسبوع اللي جاي، وأنا نفسي أقولها لأ. لكن عارفة
حابّة أتكلم مع جوزي بس مش متأكدة لو لازم أقوله على أحساسي ناحية كلوي؟ هل أنا ببالغ؟
تحديث:
قررت أتكلم بصراحة مع جوزي بس كنت لسه بفكر هفتح الموضوع معاه إزاي.
كنت بتفرج على برنامج مع جوزي وجاتلي رسالة من أخته بتقولي إنها هتيجي بكرة مع كلوي علشان يعوموا.
جوزي شاف الرسالة وطلب مني أرد عليها وأقولها ماتجيش!
استغربت جدًا، ده جوزي بيعمل المستحيل علشان يرضي أخته ونادرًا لما يرفض لها طلب.
سألته لو في حاجة حصلت؟ جوزي ما ردش!
بعد شوية جوزي قفل التلفزيون وقال لي عايز أسألك على حاجة؟ لاحظتي أن كلوي عمرها ما بتعوم لما بتيجي بيتنا؟
حاولت أكون هادئة زي ما الناس هنا نصحتني. بس انفجرت في الضحك. وبصراحة كنت مرتاحة إنه هو اللي فتح الموضوع
أظن إن جوزي حس إني اتجننت، لما بطلت ضحك كرر سؤاله وقال لي إنه عايز إجابة بجد.
قولت له "أكيد لاحظت"
رد وهو محرج وقال لي "يعني......لاحظتي التصرفات التانية كمان؟"
باختصار. جوزي مكنش واخد باله في الأول لأنه كان مشغول في شغله ومش مركز في حاجة تانية.
بعد كده أخد باله إنها معجبة بيه وبتحاول تلفت نظره بس ماكنش عايز يضايقني علشان كده ما تكلمش معايا في حاجة.
بس بعد كده خاف إني أفتكر إنه "فرحان" بتصرفاتها معاه علشان كده قرر يتكلم معايا.
قال لي إنه اتكلم مع كلوي وقالها إنه متجوز وسعيد ومش مهتم بيها ولا بيفكر في أي واحدة تانية.
هي برضه
في النهاية جوزي كلم أخته وقالها خلي صاحبتك تبطل حركاتها ومتجيش عندنا تاني.
أخته أتعصبت وغلطت فيا وقالتله إن صاحبتها أجمل وأصغر مني!
جوزي أضايق علشاني وقال لها لو قلتي كده على مراتي تاني أنا هزعل منك ومش هكلمك.
رفضت تسكت وفضلت تقول إني بحاول أربطة بالعيال علشان كده أنا حامل. وإنّي قاعدة في البيت مرتاحة وبخلي جوزي يشتغل كتير جدًا علشان يقدر يكفي العيشة المرفهة اللي أنا عايزاها (ده مش حقيقي)، والمفروض جوزي يجبرني أتخلص من البيبي.
جوزي انفجر فيها وقال لها ممنوع تدخل بيتنا تاني غير لما تعتذر لي عن تصرفاتها وكلامها عني وإنه مش عارف إزاي هيسامحها خصوصًا بعد كلامها عن البيبي وإزاي هي بتفكر في ابننا كده!!
اعتذرت وقعدت تعيط وتقول لأخوها إنها كانت خايفة تخسره ومش بتفكر صح. جوزي قفل السكة في وشها.
من وقتها وهي بتبعت رسائل وبتتحايل على جوزي يصالحها ويرد عليها وهو مش عايز يرد.
جوزي سألني ليه ما تكلمتش معاه بصراحة من الأول؟
قلتله علشان عارفة إنك بتحب أختك قوي ومش بتقبل عليها ولا كلمة.
قعد ينكر ويدافع عن نفسه شوية وفي الآخر اعترف إنه فعلًا حساس من ناحيتها. بس وعدني إنه هيكون أحسن وبعد كده ممكن نتكلم مع بعض في كل حاجة بصراحة.
جوزي طلب نروح لاستشارة الأزواج. قال لي إن مفيش أي حاجة غلط في جوازنا بس هو عايز يروح علشان ما يحصلش مشاكل في المستقبل.
قال لي إنه متأكد إن أخته هتيجي تاني ومش هتبعد عنه.
