مرات ابني بقلم لمياء شاهين

ازاي مرات ابني علمتني درس عمري ما هنساه
تقول صاحبة القصة
من وقت طلاقي من أبو ابني وأنا لاحظت إن ابني بيدخل في علاقات كتير فاشلة.. علاقات كلها فيها البنات بتدور على فلوسه وبس.. كانوا بيعاملوه على إنه ATM..
لما مايا ظهرت في الصورة.. كنت مستعدة ليها.. كانت لابسه بنطلون جينز غالي وشنطة لمصمم.. أول ما شوفتها اتأكدت إن وجهة نظري فيها زي كل اللي قبلها..
كنت شايفه بوضوح علامات الدولارات في عنيها.. من أول ما دخلت البيت.. ممدتش ايدها على اللازانيا اللي كنت عاملاها بأيدي..
قلبت وشي لما سألت جيك ابني على الترقية بتاعته قبل حتى ما تسلم عليه.. خلاص أنا عارفه هي عايزة ايه ومش هسيبها تعمله..
ابني كان شغال في شركة صعب على أي حد في سنه إنه يشتغل فيها.. دي حلم بالنسبة لشباب كتير.. وهي كانت فاهمه ده وبتتعامل معاه على إنه تذكرتها للخروج من الفقر.. بقت تظهر وتيجي البيت كتير.. دايما وقت العشا.. دايما عندها مشكلة وبتتكلم عنها.. مش ثابته في وظيفه..
جيك كان بيدفع كل الفواتير في نفس الوقت اللي هي بتتسوق فيه على النت.. كنت بقفل بقي ڠصب عني وأنا براقب تصرفاتها.

. لحد ما في ليلة كانت بتقول إنها محتاج عجل جديد لعربيتها وتاني يوم جيك كان بيتكلم إن مدخراته قلت..
لما طلبت إنها تستلف العربية بتاعة جيك عشان عندها مقابلة شغل.. مقدرتش امسك نفسي.. في حاجة غلط.. ف عملت الحاجة اللي أي ام عايزه تحمي ابنها هتعملها.. أنا مشيت وراها..
لقيتها دخلت صالون ضوافر.. 3 ساعات كاملة الهانم قاعدة جوه طبعا بتعمل ضوافرها.. ماكنش في مقابله.. كانت بتكدب بس..
كنت مستعده أصارح جيك بكل حاجة.. بس لما وصلت البيت عربية مايا كانت راكنه قدام البيت.. كان الكبوت مفتوح.. جيك كان بيعلمها ازاي تغير الزيت.. كان في بقع زيت على بنطلونها الجينز الغالي.. وضوافرها باظت من محاولاتها إنها تنفذ اللي جيك بيقوله..
في نفس اليوم بالليل جيك جاله مكالمة طوارئ من شغله.. كان في سيرفر خربان ولازم يشتغل عليه طول الليل.. مايا جت بنفسها
 وحضرت له العشا عشان تاخده له في شغله..
كنت شايفاها وهي بتحضر الأكل اللي بيحبه.. بتحط المخلل المفضل عنده ومحطتش مسطرده لأنه مش بيحبها.. تفاصيل كنت متخيله إنها مش هتعرفها.. الساعات عدت.. جيك اتصل وقال إنه هيتأخر أكتر. .
مايا فضلت معايا.. نضفت المطبخ.. متكلمناش كتير.. وفي نص الليل سألتني لو عندنا أي هدوم قديمه مش عايزنها.. أمها كانت في المستشفى بتاخد علاج كيماوي وكانت بردانه وكانت عايزه تودي لها أي حاجة تدفيها..
بالوقت اتكلمنا وكانت أول مرة اتعرف عليها بجد.. الهدوم الغالية والشنطة اللي من مصمم كانت أخر هدوم تشتريها قبل ما أمها تتعب..
المقابلة بتاعة الشغل عرفت انها اترفضت قبل ما تروح وكانت محرجة تعرفنا.. وعشان كده كانت بتروح محل الضوافر بتاع صاحبتها تنضف مقابل فلوس..
جيك بعت رسالة الساعة 2 الصبح إنه لسه مش هيخلص دلوقتي..
مايا نامت على الكنبه بتاعتي.. اخدت التليفون بتاعها وفتحته عشان ألاقي تاريخ البحث بتاعها كله عن محلات البقاله اللي عامله عروض تخفيضات.. ومراكز تصليح العربيات الرخيصة.. مش زي ما انا كنت فاكره مواقع تسوق..
أخر رسالة منها لأمها كانت كاتبه لها فيها متقلقيش من موضوع الإيجار..
بعد اليوم ده بدأت تيجي خلال اليوم.. وجيك في شغله.. تحضر معايا العشا.. تنظم معايا الجراج.. تصلح الحاجات البايظه.. حتى عشان تعلمني ازاي استخدم لاب توب جيك القديم.. عمري ما شوفتها بتطلب أي حاجة..
بعد 3 شهور جيك خسر شغله.. الشركة بتاعته قفلت.. كان متدمر نفسيا.. كنت مستنيه إن مايا تختفي.. بس بالعكس.. جت ومعاها جداول مطبوعة عشان يسجل فيها مصاريفه.. وكمان 3 عروض شغل ممكن يقدم فيهم.. بعد ما جددت السيرة الذاتية بتاعته من نفسها..
في نفس اليوم قالت له إنها لقت شغل في شركة محاسبه.. أينعم كموظفه صغيرة بس بأجر ثابت وهيكفي احتياجتها واحتياجات جيك الأساسية والايجار لحد ما يلاقي شغل..
جيك حاول يرفض ويناقشها بس هي رفضت تماما تسمعه..
مايا فضلت في شغلها لحد ما بقت مديرة القسم بتاعها.. وجيك كمان اشتغل في نفس الشركة.. اتجوزوا ودلوقتي معاهم ولد وبنت..
أحيانا بشوفها ازاي بتعلمهم يتعاملوا مع
الفلوس..
يحوشوا.. ازاي يحطوا ميزانية ويلتزموا بيها..
مايا لسه بتغير الزيت بتاع عربيتها بنفسها.. لسه بتلبس نفس الجينز اللي شوفتها بيه وهي بتغير الزيت في بيتنا.. واللي عليه بقع لسه.. بتقول إنه بيفكرها بالوقت اللي كل حاجة اتغيرت فيه..
ابني متجوزش جولد ديجر.. ده اتجوز واحدة معدنها دهب.. بس للأسف أخدت وقت على ما شوفت ازاي بيلمع..
احاديث_ تيكتوكيه
Lamiaa_Shaheen