قصه مؤثره

في مرة كنت بستلم الحالات من زميلي في وحدة العناية المركزة فكان من ضمنها ست عندها ٦٢ وكان مكتوب لها على خروج بعد ما خلصت ورقها روحت أشرح لها علاجها قبل ما تخرج فبدأت بسؤال روتيني أنتي عارفة عندك أيه فقالت أنها ما تعرفش 
فشرحت ليها بهدوء اللي حصل هي كانت مريضة قلب بس حالتها تدهورت فلما كفاءة القلب قلت ده قلل الدم اللي بيوصل للكلى فعمل فشل كلوي حاد وأننا لحقنا الموضوع في الوقت المناسب والوضع تحسن والقلب والكلى بخير وأن كانت الكلى أتأثرت شوية وهتحتاج تتابع عشانها لكنها مش هتحتاج غسيل كلوي وده أول حاجة بيسأل عنها المرضى في الموقف ده فلقيتها دمعت وأنفتحت في العياط مسكت أيدها وطبطبت عليها وقولتها معلش بس الحمد لله الموضوع خفيف وقضا أخف من قضا فردت  
وهو أنا معترضة كله اللي يجيبه ربنا خير بس أنا بقالي ٥ أيام راقدة هنا ومفيش حد من الدكاترة ولا التمريض ولا أهلي فهمني اللي عندي فكنت خايفة  
اللي فات ده مش مشهد أستثنائي الست دي مثلا تابعها خلال ٥ أيام ٣ دكاترة عناية و٢ كلى مفيش واحد فيهم كلف نفسه دقيقة زيادة يوضح لها حالتها كله كان بيتعامل مع الأرقام وخلاص ويكتفي أنه يشرح للأهل ويسيب ليهم مسؤولية تبليغ المريض ده أتيتيود أغلب الدكاترة وأغلب الأهل بيختاروا يداروا الحقيقة عن المريض تحس أنها مافيا

ومتفقة على أهانة المريض والتقليل منه  
التعليم الطبي في مصر بيغض النظر بالكامل عن الأخلاقيات Ethics أنا راجل أتخرجت من الكلية معداش عليا محاضرة واحدة عنها لكن لما درست منهج طبي محترم لقيتها حاضرة بقوة وأتضح أن علاقة الطبيب والمريض قائمة على ٧ مبادئ بيتبني عليهم كل حاجة 
أول المبادئ دي هو الأستقلال Autonomy ومعناه بأختصار للمريض الحق في أتخاذ القرارت المتعلقة بصحته بشكل كامل وواجب على الطبيب تسهيل ذلك بأمداده بكل المعلومات الضرورية ده أول المبادئ وأهمها أن يا دكتور أوعى تنسى نفسك وتفتكر أنك وصي على المريض وبتفهم عنه أنت دورك في عملية العلاج أنك خبير فني مطلوب منك توفر المعرفة العلمية للمريض بحيث يقدر يقرر لنفسه على نور واحد من المبادئ التانية هو الثقة والأمانة في التعامل مع المريض ده أسمه شارح نفسه 
لو خدت بالك أنا عمال أتكلم عن علاقة المريض والطبيب مفيش كلمة هنا عن أهل المريض أقرأ أول مبدأ تاني طالما المريض أنسان بالغ عاقل فأنت كلامك معاه تتكلم مع الأهل لما يكون المريض فاقد الوعي أو فاقد القوى العقلية وهنرجع لدول لقدام بس أصبر 
من هنا نقدر نفهم مدى الأجرام لما طبيب يتواطئ مع أهل المريض في أخفاء حقيقة مرضه عنه ده تعدي سافر على حق المريض وأهانة ليه ووزر الجريمة يقع على الطبيب أولا والأهل ثانيا  
أنا فاهم أن الناس بتعمل ده بدوافع نبيلة أنا نفسي عملتها قبل كده بس ده لا ينفي أنها جريمة 
أي تبرير أنت متخيله للموضوع ده هو من ناحية زائف ومن ناحية مهين لمريضك  
خايف أبوك اللي مش متعلم ما يفهمش أنه عنده القلب ليه هو عنده ٣ سنين 
خايف على نفسية أمك تتأثر 
يعني هو أنت أنضج منها أنت قادر على تحمل ثقل الخبر وتتأقلم عليه بينما هي محدودة التجارب وجديدة على الدنيا ومش هتستوعب 
خايف عليها تموت من الخضة  
مش فاهم الأسطورة دي ظهرت أمتى وفين بس عموما أطمن ده عمره ما حصل المريض لما بيتبلغ بحالته بيكون هو نفسه عارف أنه فيه مشكلة أومال هو راح للدكتور أصلا ليه 
وبعدين تعالى معلش بأمانة أنت لو تعبان تحب تعرف حقيقة اللي عندك مهما كان ولا تحب يخبوا عندك 
الغالبية الكاسحة من الناس بتختار تعرف الناس يهمها تفهم اللي بتمر بيه وده بيكون أرحم بيهم من أنك تسيبهم لدماغهم ولخوفهم بس بفرض أنك من الأقلية اللي أختارت أنها ما تعرفش فدي ليها حل التفويض ببساطة زي ما من حق المريض يعرف تفاصيل حالته وخطة العلاج فهو من حقه كمان يتنازل عن الحق ده ساعتها بيفوض حد تاني يتكلم مع الطبيب ويعرف منه وياخد القرار بالنيابة عنه  
يعني أيه حد يكون شايف نفسه بالغ راشد متزن بينما أبوه أو أمه أطفال لا تعقل ولا تتحمل الأخبار السيئة 
طب أيه رأيك أني لسه دلوقتي ضاحك عليك  
لأن حتى الطفل المريض ليه كامل الحق في المعرفة رغم أن أهله هما اللي هياخدوا القرار في النهاية بس لازم الطفل يفهم بمقدار ما يمكن طبيعة مرضه وطبيعة العلاج فأنت حرفيا عاملت مريضك أنه أقل من طفل 
وعارف أقل من مين كمان  
المعاق ذهنيا حتى ده من حقه يعرف بل ويشارك في أتخاذ القرار برغم طبعا وجود وصي عليه طبعا في الحالات القصوى من الأعاقة الذهنية ده بيكون مستحيل بس ده الأستثناء فأنت كدا أعتبرت مريضك أقل نضجا من طفل وأقل فهما وتفهما من معاق ذهنيا 
عارف هتقول أن لو الحالة خطيرة قوي زي السرطان المتأخر فالمريض ممكن لو عرف الحقيقة يرفض العلاج طب وماله ما ده حقه لو شايف أنه مش عايز يحاول وأن الموضوع هيبقى تعذيب وخلاص فأنت مين أنت عشان تعتقد أنك بتفهم عنه أنت مين عشان تحدد أولوياته وبعدين أنت منجم يعني عشان تعرف رأيه 
هتقولي خايف صحته النفسية تتأثر ما عادي يعني لازم تتأثر بس اللي بيحصل بعدين أن المريض بيتفهم وبيتأقبم زي ما أنت نفسك تأقلمت في النهاية حزن المعرفة أفضل من الخوف من المجهول ممكن أحكي ليك عشرات القصص اللي شوفتها عن النقطة دي 
لو حسيت أن كلامي قاسي ومفتقد الدبلوماسية فأنت معاك حق بس أنا مش أسف 
تمت
منقول